Buhhum lei chhunzawm zel a ni dawn

Tualchhung Buhthar a pun zel theihna turin Sawrkarin Buhhum a lei mek thu leh a lei zel dawn thu Agriculture Minister PC. Vanlalruata chuan sawiin, man man zawka an leizel theihna turin hmalak a nih dawn thu a sawi.

    Agriculture Minister chuan Mizoram Sawrkarin Paddy & Rice Procurement Committee a din angin hmalak mek zel a ni tih sawiin, nikum December ni 19-ah Thingdawl Pangbawl kawn Rice Mill-ah a lei tura an thlan te atangin Buhhum Kg. 1 zelah Rs. 30 in lei tan mek a nih thu sawi a, tunah hian kar khatah nikhata leini tur ruahman a nih thu a sawi bawk. Agriculture Minister chuan tunah hian Kolasib leh Mamit District-te Pilot Project a kalpui mek niin hmundang pawh hmalak tum a nih thu sawiin, Buh tharah kan la intodelh chiah lo chungin Buh tharchhuah a tam theih nan sawrkarin theihtawp a chhuah zel dawn tih a sawi a, tunah hian Om Om Rice Mill-te chuan Thingdawl Pangbalkawn-ah Buhhum hi lei mekin tun dinhmunah Buhhum quintal 481 a lei tawh a, hengte hi Food, Civil Supply & Consumer Affairs-te nen inberawn in tualchhung Ration buhfai atan an la chhawng ve leh dawn tih a sawi a ni.