ZORO in Free Movement Regime tihtawpna hlip leh turin sawrkar laipui an ngen

Zo Re-unification Organisation (ZORO) General Hqrs. chuan Free Movement Regime ti tawpa India leh Myanmar ramri kan tura Border Crossing Permit lak a ngai ta chu pawi an tih thu sawiin, sawrkar laipui chu Free Movement Regime a tih tawpna hlip leh ngei turin an ngen tih an sawi.

Nimin-a thuchhuah an siamah ZORO General Hqrs. chuan sawrkar laipui-a Ministry of Home Affairs (Border Management -I Division) chuan December 24, 2024 khan Mizoram Chief Secretary chu lehkha thawnin India-Myanmar International ramri kalkan tura thil tih dan tur a rawn hriattir thu leh hemi dungzui hian Mizoram sawrkar-a Home Department chuan Director General of Police, Mizoram hnenah December 30, 2024 khan ramri a hmalak dan tur thawnin Champhai Superintendent of Police chuan mipuite hriattirna tichhuakin Myanmar leh India ramri kaltlang turte reng rengin Border Pass an neih a ngaih tur thu a puang ta tih an sawi a ni.

United Nations Declaration on the Rights of Indighenous Peoples 2007 Article 36-ah chuan ‘Tualchhuak hnamte, a bik takin khawvel sawrkar ramri khamin a thendarhte chu an inkalpawhin an in tanpui anga, Sakhaw thil leh khawtlang thil, ei leh bar leh politics-ah te anmahni mi leh sa te nen inpawha in pawlho theihna dikna chanvo an nei,’ tih leh ‘Ram roreltute chuan tualchhuak hnamte nena inberawnin hetiang dikna chanvo te hi tipuitling turin hma a la ang,’ tih a nih thu ZORO chuan sawiin, “He Declaration UN General Assembly-a sawi hoa pass a nih lai khan India chuan he Declaration hi tha tia vote tu kha a ni a. Hemi chungchangah hian ZORO pawhin India President leh Prime Minister hnenah pawh lawmthu a sawi tawh a ni. Amaherawh chu tunah UN Declaration on the Rights of Indigenous Peoples 2007 chu a dodal zawngin hma a la a, tunhma atanga Zofa ten zalen taka kan inkalpawhna Free Movement Regime chu a thiat ta a, Border Pass tel lo chuan tuman ramri kanin kan unauate tlawh pawh phal a ni ta lo,” an ti.

FMR titawpa India-Myanmar ramri kan tura Border Crossing Permit lak a ngai ta chu ZORO General Hqrs. chuan pawi an ti em em tih an thuchhuah ah hian tarlangin, “UN in Declaration on the Rights of Indigenous Peoples 2007 Articles 36 (1) & (2) a chunga tarlan Dikna chanvo (Right) min pek kan hmang thei lo tur hi kan Dikna chanvo rahbehna a ni,” an ti a, hei vang hian India sawrkar laipui in Free Movement Regime a tihtawpna hi hlip leh ngei turin an ngen tih an sawi a, “He kan dikna chanvo nei let leh tur hian ZORO chuan a tawp thlengin a bei zel ang,” an ti bawk.