Airfield Branch YMA ten hriatthiamna an dil

Airfield Branch YMA chuan nimin khan thuchhuah siamin Dec. 18, 2024 zan-a Airfield khuaa thil thleng chungchangah sual leh ruihhlo khawtlangin a dona kawngah tawhsual tawh palh chang a awm thin tih hretu Mizoram mipuite leh YMA member-te hriatthiamna an dil tih an sawi.

    Thuchhuah an siamah hian Airfield Vengthar Pastor Quarters chu Dec. 18, 2024 zan inkhawm hlana rawk a nih thu leh Rs. 24,000 bo in inkhawm tan hma lawka Pastor Quarters bulhnaia Drug addict leh rukru thang taka khawtlangin a hriat David Lalmuanpuia (L) leh Lalduhsaka, Airfield Veng te chu hmuh an nih avangin khawtlang hruaitute'n VDP Office-ah koin Pastor Quarters a lut a pawisa an lak ngei thu an sawi thu leh an inpuanna video pawh kawl that a nih thu an tarlang a. An inpuan hnuah an pawisa ruk an dahna an sawiah hmuh a nih loh avang leh dawt an sawi kual reng avangin David Lalawmpuia hi kawl zui a ni a, hun engemaw ti hnuah nikhaw hre lo va awmin damdawi in panpui a nih hnuah a thi ta tih an tarlang bawk a ni.