ZMC-a Neurosurgery Department din dan tur sawiho

Zoram Medical College (ZMC)-a Neurosurgery Department din a nih theih dan tur chungchangah Larsap Dr. Hari Babu Kambhampati chuan nimin khan Health Minister Lalrinpuii leh sawrkar mi pawimawh dangte a kawm.

Raj Bhavan-a an inkawmna ah hian Health Minister bakah hian Adviser to CM (Finance & Planning) TBC Lalvenchhunga, ZMC Director Dr. John Zohmingthanga leh Dr. Haroon M. Pillay, Neurosurgeon, Silverline Hospital, Kochi-te an tel a. Governor Dr. Hari Babu Kambhampati chuan CSR Fund-te hmasawnna ruhrel siam nana chhawr tangkai a pawimawh thu sawiin, zirna, hriselna leh a dangah te pawh CSR Fund haichhuah a nih theih nan Public Sector Undertaking (PSU) hrang hrangah rawtna te thlen zung zung a tul thu a sawi a. Prime Minister-in PSU te chu NE State tan an CSR Fund-te hmang uar tura a chah thu pawh sawiin, hei hi remchangah hmanga Fund haichhuah dan kawng kan ngaihven nasat lehzual a tul hle a ni, a ti bawk.

Health Minister Lalrinpuii pawhin hrilselna kawnga hmasawnna tura theihtawp chhuah mek zel a nih thu he hunah hian sawiin, ZMC-ah Neurosurgery Department awm theih nana hmalak mek bakah Cardiothoraco Vascular Surgery OT Unit, IVF Centre leh tul dangte a awm thei nana tanlak chhunzawm zel a pawimawh thu a sawi a. Health infrastructure tihchangtlun a nih theih nana Governor hmalakna leh thahnemngaihna chu fakawm a tih thu a sawi bawk.

He hunah hian Neurosurgery Department ZMC-a hawn a nih theih nana hmalak tul hrang hrangte sawiho a ni a. Hmunhma thuhla ah harsatna a awm loh thu tarlan niin, hemi atana sum mamawh zat tur leh Detailed Project proposal siamte thlirhoa pawm a ni a. Hemi tur hian Indian Oil Corporation Ltd. (IOCL) te inhuam angin CSR Fund dil nise, a ranglamin Detailed Project proposal thawna ngaihven zui nise tih a ni.