Mizoram-ah National Pollution Control Day hmang

National Pollution Control Day pualin nimin Dec. 2, 2024 khan khan Mizoram District hrang hrangah Mizoram Pollution Control Board (MPCB) hmalâknain faina hnatlang runpui neih a ni.

National Pollution Control Day pual hian Mizoram district hrang hrangah a rualin District Education Office (DEO) leh MPCB kaihhruaina in School Eco-Club naupangte nen a huhoa kawngpui leh luidung thenfai hnatlâng rûnpui an nei a, mi 5000 chuang an thawkchhuak a ni. Aizawl-ah chuan MPCB Staff-te leh sikul thlanchhuah bîka Eco-Club member te’n Tuikual lui, Lawibual lui leh Chite lui-a hmankhat daih sarâng lam bawlh-hlawhte chharin an hnatlâng a, hêng an bawlhhlawh chharkhâwm te hi Tuirial-a bawlhhlawh paihna hmunah an paih nghal bawk a ni.

National Pollution Control Day hi kumtin December ni 2-ah hman thin a ni a, he ni hi kum 1984-a Bhopal Gas Tragedy-a nun chântâ te hriatreng nâna tih niin mipuite hnêna pollution chungchâng inzirtir nân leh environment humhima tibawlhhlawh (pollute)-lo zâwnga khawsa tura infuih thar nâna hman thin a ni a. Kumin-a National Pollution Control Day pual hian MPCB chuan ‘Clean Air, Green Earth’ tih thupui hmangin Photography Competition an buatsaih bawk a, Online Poster Making Competition-te buatsaih bawkin boruak thianghlim (clean air) pawimawhzia inzirtirna atan Public campaign chu November ni 30 khân Mizoram University Eco-Club member-te nen hlawhtling taka buatsaih a ni bawk.