Zangnadawmna pek theih dan inhrilhhriat a ni

Kangmei lakah fimkhur a tulna leh kangmei vanga chhiatna thlen palha thuneitute hnena in report dan tur inhrilhhriatna hun chu nimin khan Hnahthial-ah buatsaih a ni.

Hnahthial District Disaster Management Authority (DDMA) leh Village Level Disaster Management Committee (VLDMC) te tana hemi chungchang inhrilhhriatna hun Hnahthial DC Meeting Hall-a neih ah hian Bawrhsap Rita Lalnunmawii Pachuau chuan Fur khuaa leimin loh nana kan fimkhur ang chiah hian thal a lo nih hian kangmei lakah pawh fimkhur a tul thu a sawi a. Kangmei vanga chhiatna a lo thlen hian zangnadawmna dawn theih (relief fund) chu a bei tham thin avangin kangmei chhuahtir loh hram hi duhthusam anih thu a sawi a. Ranvulhna hmun, a bikin Ar In leh Vawk In-ah te Bulb puak vang leh Vawk chaw chhumna mei vil that loh avang ten kangmei a chhuah thin thu sawiin, ranvulhtute pawh an fimkhur lehzual a tul thu a sawi a. Current kalsual chu In kang tam tak siamtu anih avangin In lama wiring pawh mahni thiam dan dana lo zam ve mai lo turin leh mi thiam tak tak chauh wiring khawihtir nise a duh thu a sawi bawk.

He hunah hian kangmei vanga chhiatna thlen thulha thuneitute hnena zangnadawmna dawn theih nan a in report dan tur SDO (Sadar) Esther Leihang chuan tarlangin, Kangmei a lo chhuah chuan VLDMC te chuan DC Office-ah DDMA hmunpui anihna angin a rang thei ang berin an report tur a ni a. Chiattawkte chuan an chhiat tawh dan milin form an fill up anga, Bank Passbook phek hmasa ber Xerox thil telin VC forwarding letter nen DC Office-ah an thehlut anga. DDMA lamin lo endikin felfai an tih chuan zangnadawmna pawisa a lo pe chhuak thei dawn a ni. 

Kangmei vanga chhiat tawh palha zangnadawmna dawn theih langsar zual he huna tarlan a nih danin In (Kutcha House) kangchhe vek ah Rs 1,30,000 leh a then kang ah Rs. 4000/- pek theih a ni a, In (Hut) pakhat zelah Rs 8,000/-; Thawmhnaw kang leh Inchhung bungrua kang ah Rs. 2500/- zel pek theih niin Lo kang-ah ram hectare khat zelah Rs. 18,000/- pek theih a ni bawk a, Ranvulh kang ah Vawk-ah Rs. 4000/- leh Ar pakhat zelah Rs. 100/- pek theih a ni bawk a, Ran In kang ah Rs. 3000/- pek theih a ni bawk.

Hetiang hian zangnadawmna pek theih a nih rualin dan phalloh thil tih vang emaw, tihluih vang emaw a kangmei tichhuakte chu zangnadawmna pek an nih dawn loh mai bakah dan anga hrem theih an nih thu he hunah hian tarlan a ni bawk a. Kangmei laka fimkhurna tur pawimawh hrang hrangte pawh he hunah hian tarlan niin kangmei leh chhiatna hrim hrim a thlen chuan a rang thei ang berin WhatsApp emaw, a remchan dan dang emaw a inhrilhhriat vat a pawimawh thu tarlan a ni bawk.