Sialsuk in rampum huapa lawmman lak an lawm

Zonuna Kawlni (LENKAWL) • December 6, 2024 • Comments • Mizoram

Sialsuk khua chuan India ram pum huapa ‘Best Tourism Village, Community Based, 2024’ lawmman an dawn lawmna hun nimin khan khawtlang huapin an nei a, Tourism Minister Lalrinpuii chuan a hmanpui a ni.

Sialsuk khawtlang in an lawmman lak an lawmna hunah hian Tourism Minister chuan Kalphung thar hnuaiah Tourism lamah hmasawnna thar a thlen chhoh mek dan te sawiin, Event huaihawt lamah pawh mipui ten hma hruaiin, Sawrkar chu a fual lai dawmtu (facilitator) ah zawk a tang chho mek tih a sawi a. Sialsuk khua in India ram pum huapa Best Tourist Village - Community Based Tourism lawmman an dawng thei chu khaw mipui leh khawtlang hruaitute thawhhona that vang a nih thu sawiin, chhuanawm a tih thu a tarlang a. Sialsuk khua chu khualzin ten tlawh an chak bucket list ah telh a nih ngei theihna tura theihtawp chhuahpui turin khawtlang mipuite chu a sawm nghal bawk a ni.

He hunah hian Khualzahawm Bialtu MLA Baryl Vanneihsangi Tlau pawhin thinlung taka Sialsuk khawtlvang a lawmpui thu sawiin, Award tam zawk dawng thei tur khawpa hma la chho zel a tangrual zel turin a fuih bawk.

Best Tourist Village lawmna zawh hnu hian Health Department changtu Minister ni bawk Lalrinpuii hian Sialsuk PHC pawh tlawhin, Khawtlang hruaitute nen PHC tihchangtlun dan tur kawng hrang hrangte an sawiho nghal a ni.