HRDP kalpui tur chungchangah thutkhawm nei

Lnglei District chhung Lungsen RD Block-a Holistic Rural Development Project (HRDP) kalpui tur chungchang chu nimin khan Lunglei DC Navneet Mann-i hovin a Pisa-ah sawiho a ni.

Lunglei District chhunga Lungsen RD Block hi Aspirational Block a nih angin hmasawnna huapzo leh tluantling a awm theih nan Lunglei District thuneitute chuan sawrkar ruahmanna kaltlanga hna thawh tur bakah, pawn lam atanga hmalakpuitu tur an dap bawk a. Hemi rah chhuahah hian Society for Action in Community Health (SACH), New Delhi chuan Lungsen Block chhunga khaw 10-ah thla 36 chhung atan Holistic Rural Development Project (HRDP) kalpui turin ruahmanna an siam a. He project bultanna atana thil tul hrang hrang - Office hmun tur ruahman, hmalakna tur khua tlawh, khawtlang hruaitute leh mipui nena inkawmho leh project kalpui tura hun bi leh hmachhawp ruahman fel te chu tun tumah hian ngaihtuah a ni.

HRDP hnuaiah hian hmalakna peng hrang hrang - thiam thil inzirtir leh mipui khawsak chawikan te, thei leh thlai chin lama hmalak te, sumdawnna lam tihhmasawn te, hriselna leh faina lama hmasawn te, ni tha chakna hman tangkai te, zirna In leh Anganwadi tihchangtlun te, khawtlang thawhhona tihchak leh sum leh pai enkawl thiamna inzirtir te kalpui tum a ni a. Project hi kum 3 chhung kalpui tur niin, sum senso tur hi HDFC Bank-in Corporate Social Responsibility (CSR) hnuaiah an tum dawn a ni.