Tuichangral leh Tuipuiral Games te Pilot Project ah

Kumtin-a neih thin Tuichangral Games leh Tuipuiral Games te chu Mizoram Sawrkar in Olympic 2036-ah Mizo infiammi tam thei ang ber tirh a tumna ah Pilot Project atan thlan an ni.

Heng Sports neih thin chungchang ngaihtuah hian Inrinni khan Sports Minister Lalnghinglova Hmar hovin a Pisa-ah thukhawm neih a ni a, he hunah hian Sports Minister chuan Mizoram Sawrkar in Olympic 2036-ah Mizo infiammi tam thei ang ber tirh a tum tih sawiin, Tuipuiral GSA leh Tui-changral GSA te chu kumtin a inkhawmpui (Games) buatsaih thin an nih angin, Pilot Project atan thlan an ni tih a sawi a. Tunhnaiah Mizoram in National leh International Level-a intihsiaknaah result duhawm tak tak kan neih thu sawiin, kan rilru in National Games mai bakah Asian Games leh Olympic Games thlengin hlawhtlinna a ngaihtuah ngam tur a nih thu a sawi bawk.

Tuipuiral GSA hnuaiah hian Association 25 awmin, Tuipuiral Annual Sports Meet vawi 52-na hi January 13, 2025 atangin Samthang-ah neih a ni dawn a. Kumdanga Sports discipline an kalpui thin bakah, State Sports Association te nen tangkawpin Boxing leh Archery an telh dawn a. Tuichangral GSA hnuaiah hian Association 33 awmin March 31 – April 9, 2025 chhunga East Lungdar-a Games an neih turah State Sports Association te nen tangkawpin kum 8 leh kum 16 inkar tan Boxing, Wrestling leh Weigh-tlifting te an telh anga. Mizoram Sawrkar chuan heng sports discipline-ah te hian Rs. 1,00,000/- (Cheng nuaikhat) theuhin a pui dawn a ni.

He thutkhawm ah hian heng sports discipline telh tura inbuatsaih ngai hrang hrangte sawiho nghal a ni a. Sports Association te nen tangkawpin Coach te bakah Senior player te’n training an pe hmasa dawn a ni. Heng training te hi Games tan hmain a huamchunga khaw thlanchhuah bikah te kalchilhin pek an ni ang.