Mizoram-a Kraws lian ber tur siam mek a ni

Zonuna Kawlni (LENKAWL) • December 2, 2024 • Comments • Mizoram

Cheng vbc. 2 senna tura ruahman, Mizoram-a kraws lian ber tu chu Aizawl Theological College (ATC) hmunah siam mek a ni a, he kraws hi ft. 101-a sang tura ruahman niin tun thlengin zaa 50 (50%) vel zawh tawh a ni.

Kum 2018 November 13-a Synod Executive Committee (SEC) remtihna anga Aizawl Theological College (ATC) hmuna kraws lian siam hnathawh mek hi August 31, 2020-ah hna tanna leh hnatlang hmasa ber neih a ni a. Tunah hian hnathawh tur atanga chhutin za zela 50 bawr vel thawh zawh a ni tawh a, hmabak pawh a la tam hle a. Kraws lian siamna tur pawisa hi Synod-in a hranpain budget a siam lo a, Kohhran leh mimal/chhungkua, pawl leh hriatrengna (memorial) pual, Anniversary/Jubilee pual atangin thilpek a lut a, chumi hmang chuan thawh thin a ni.

Kraws lian din thu hi September 10, 2018-ah Theological Education Broad (TEB) Building Sub-Committee-in a ngaihtuah tan a, SEC-ah thlenin SEC chuan ‘mimal leh kohhranhote atanga sum thawhkhawm hmanga din nise,’ a ti a. Kraws lian hi ATC Main building kawt, Aizawl khawpui atanga lang thei tura din a ni a. A san zawng feet 101 niin, a kraws ban zau zawng feet 30 a ni a, a base zau zawng feet 57 ni tura ruahman a ni. A kraws foundation hi feet 12-a thuka laih niin a hnuaiah fianrial-a Pathian pawl duhten an hman tur Hall siam a ni bawk. He kraws lian siam zawh hun tura ruahmanna siam chhin chu a pel tawh a, hei hi duh anga hmalakna tur sum a luh that/chak tawk loh vang a ni.