Kalphung thar sawrkar ah Officer te eirukna lakah an fihlim ngei tur a ni - Chief Minister

Chief Minister Lalduhoma chuan, “Kalphung thar sawrkar-ah Officer te eirukna lakah an fihlim ngei tur a ni,” a ti.

Mizoram Finance & Account Service Association ten nimin-a Annual General Conference vawi 29-na Aijal Club-a an neih a hmanpuina ah Finance changtu ni bawk Chief Minister Lalduhoma chuan Finance leh Planning lam a that loh chuan sawrkar sum kalphung leh hmalakna a kal dik thei thin lo tih sawiin, “Hun reilote chhungin Finance leh Planning lamah hian thil inthlakthleng duhawm tak tak kan hmu tawh a ni,” a ti a. Kalphung tharah sawrkar hnathawkte eirukna lakah an fihlim ngei ngei tur a ni tih sawiin, “Nangni kan Finance Officer te phei chu in dik mai a tawk lo, mi dangin mi dik in ni tih an hmuh a ngai. Sawrkarin hnathawk a lak hian Human Resource Investment a nei tihna a ni a, kha hnathawktu kha sawrkar tana thawk chhuaktu tangkai a nihzui ngei a ngai,” a ti a. Mizoram mipuiten an beisei inrelbawlna tha (Good Governance) a awm theih nan Project Monitoring lamah tan an la nasa tih sawiin, Dashboard hmanga a Office atanga project zawng zawng lo endikna tur an peih tep tawh tih a sawi a. “Service Review Committee pawh din turin thu kan chhuah a, aikal lak kan titawp a, Biometric Attendance kan kalpui bawk,” a ti.

Inrenchemna lamah Assembly Legislators ten bul an tan thu leh an hamthatna an titlem tih sawiin, “Official ten in rawn zui a. Vawiin a MLA leh Minister ten hamthatna an dawn mek hi party tin aiawh MLA te telna, Assembly General Purpose Committee pawmpui a ni,” a ti a. “Kan budget hmasa ber hi kan dinhmun dik tak tarlang thei tura duan (realistic budget) a ni a. Kan data neih ten duhthu erawh an la sam chiah lo. Data dik tak neiha kan nihna dik tak hriat hi tul kan ti a, data dik neih kawngah hmasawn zel kan tum. Budget proposal siam hun kan lo thleng leh der tawh a, budget dik (realistic) tak kawng hi department tinten i zawh ang u. Budget lang mawi tak, kan nihna ni lo deuh si an hmuh khan kan lan that hmel a. Revenue Deficut Grant kan hmuh hniam phah thei,” tiin Political Advantage atana lan that ai chuan kan nihna dik tak kan lantir khan ram tan a hnemhnanpuiawm zawk tih a sawi bawk.

Chief Minister chuan ‘a tlem thei ang ber sum puk nise’ an tih thu sawiin, “Overdraft lova kal hram kan tum a, K-deposit pawh tihtlem nise kan ti. K-deposit hian Financial Year kal meka kan sum hmuh te a ei hek ve zel vang a ni. Kan enkawl zawh tawk project la ila, Scheme a awm vang ringawta bawhzui lovin kan ram in a mamawh dan zawk hi lal se kan ti,” a ti a. Sawrkar hnathawk hlawh chu a hma thei ang bera pek zel tumin an beih fat fat thin thu leh Power bill ba pawh chinfela, pe tha lawmman (rebate) lak theih zel an tum thu a sawi bawk a ni.