Serchhip District chhungah State leh ram dang atanga raltlan rawn lut 482 an awm mek
Serchhip DC Office atanga LENKAWL in thu a dawn danin Serchhip District-ah hian ramdang leh State dang atanga sahimna zawnga raltlan rawn lut hi mi 482 awm mekin heng zinga mi 460 te chu Myanmar atanga sahimna zawnga rawn raltlan te an ni a, midang 22 te chu Manipur atanga rawn raltlan te niin Mizoram hmun thenkhat ah Bangladesh atanga raltlan rawn lut awm mah se Serchhip District-ah chuan Bangladesh atanga raltlan rawn lut hi an awm lo thung a. Heng raltlan te chungchang hi Thawhtanni khan Bawrhsap hovin mi pawimawh ten an ngaihtuah bawk.
LENKAWL in thu a dawn danin Serchhip District-ah hian raltlan te a huho-a an awmna tur Relief Camp siam awm lovin Serchhip District-a raltlan awm zawng zawngte hi Relief Camp pawnlam-a awm niin thenkhat te hian an chhung leh khat an belh laiin thenkhat erawh In luahin an khawsa thung a, Serchhip District chhunga Myanmar atanga raltlan rawn lut mi 460 zinga mi 132 te hi mipa puitling niin hmeichhe puitling 120 an awm bawk a, naupang kum 18 hnuailam mi 206 an awm bawk a, heng raltlan te hi District chhunga khaw hrang hrang 24-ah an awm mek a ni. Manipur atanga raltlan rawn lut mi 22 te hi District chhunga khaw pahnih ah an awm thung a, mipa leh hmeichhia puitling mi 7 ve ve awmin naupang kum 18 hnuailam mi 8 an awm bawk a ni.
Serchhip-a District Civil Supply Officer (DCSO) Office atanga LENKAWL in thu a dawn danin sawrkar laipui in raltlan te hnena buhfai a thlawna sem tura ruahman chu Serchhip District-ah hian rawn phurh thlen a ni tawh a, buhfai sem tur hi bag 315 rawn phurh thlen niin a vaiin quintal 150.63 leh gram 100 a ni a, buhfai sem-chhuah dan tur erawh District thuneitute ruahman tur a nih thu thudawnna chuan a sawi a. Serchhip DC Office-a thawktute pawhin buhfai hi a rawn thlen tawh thu sawiin, a semchhuah dan tur erawh tihfel ala nih loh thu an sawi a. Serchhip District-a raltlan awm zat hi buhfai ruahman a nih lai leh tun dinhmun ah a inang tawh lo tih sawiin, hei vang hian a semchhuah dan tur hi ennawn leh mek a nih thu leh tunah hian File kal mekin hemi hi tihfel a nih veleh sem-chhuah a nih dawn thu an sawi a ni.
Tarlan tawh thin angin sawrkar laipui chuan Mizoram-a raltlan te buhfai semna tur hian cheng vbc. 5 ruahmanin hemi atang hian buhfai MT 1,379 leh quintal 30 lak-chhuah a ni a, mi pakhat tan kg. 30 vel bawra sem theih tur a ni ang.
Myanmar raltlan awm zat :
Khua Raltlan awm zat
Serchhip Dinthar 80
Chhingchhip Mualpui 57
Baktawng 37
Serchhip Chhim Veng 37
Serchhip Darnam 33
Serchhip Kawnpui 31
North Vanlaiphai 28
Leng 23
Thenzawl East 20
Serchhip P&E Veng 14
Serchhip Hmar Veng 13
Serchhip Kawnpui North 11
Khumtung 11
Keitum 9
New Serchhip North 8
Serchhip Field Veng 8
Vanchengte 7
Bawktlang 6
East Lungdar 5
Chhuanthar Tlangnuam 5
Khawlailung 5
New Serchhip South 5
Bungtlang 4
Sailulak 3
Total 460
Manipur raltlan awm zat :
Khua Raltlan zat
Thenzawl Vengthar 12
Serchhip P&E Veng 10
Total 22