Hnathawktu atana Mizoram PWD thlan loh vanga harsatna tawk niin Rajya Sabha MP in a sawi

Zonuna Kawlni (LENKAWL) • December 6, 2024 • Comments • Mizoram

Mizoram Rajya Sabha MP K. Vanlalvena chuan Myanmar ramri panna kawng, Sangau to Saisihchhuah kawng sialna atana DoNER in cheng vbc. 66.08 a lo sanction fel tawh Cancel a ni chu hnathawktu atana Mizoram PWD thlang lova BRO an thlan zawk avanga harsatna hi tawk an nih thu a sawi.

Development of North Eastern Region(DoNER) Consultative Meeting chu Parliament Anexie building Committee Room-ah niminpiah tlai khan DoNER Minister Jyotiraditya M.Scindia kaihhruaina in neih a ni a, he hunah hian Rajya Sabha MP K. Vanlalvena chuan Parliament Monsoon Session neih zawh takah August ni 8-a a zawhna Union Minister of State for DoNER Sukanta Majumdar-a’n ‘Myanmar ramri panna kawng Sangau to Saisihchhuah kawng sialna atana DoNER in cheng vbc. 66.08 a lo sanction fel tawh Cancel a ni’ tia a chhanna chungchang sawiin, Kum 2021 February ni 10-ah he kawngpui laihna tur pawisa hi DoNER in NEC kaltlangin sanction order a tihchhuah thu leh hnathawktu atana Mizoram PWD thlang lova BRO an thlan zawk avanga harsatna hi tawk an nih thu a sawi a. PWD te ruahmanna pawm duh lova BRO ten Pang khua paltlanga kawngpui sial an tum avang leh Pang khaw mipui ten compensation pek an phut si avanga he project hi kal tluang lo a nih thu a sawi a. PWD te ruahman ang chuan kawngpui hian khawchhung a paltlang dawn loh avangin compensation-ah harsatna a awm dawn loh thu a sawi bawk a. He project hi khatih hun laia Mizoram Chief Minister Zoramthanga priority list ami a nih avangin pawisa pek tawh hnuhkir leh hi a rem loh thu a sawi bawk a ni.

Monsoon Session kaltaa DoNER Minister of State Sukanta Majumdara’n zawhna a chhan dan chuan June 2024 thlenga kawngpui laihna tur ram Mizoram sawrkarin a pek theih loh avanga he project hi cancel a nih thu a sawi bakah Border road ruahman mek Thingsai - Bualpui - Pangkhua - Sangau kawng laih tur Long term project atan BRO General Staff funding atana dah niin a sawi bawk a ni.

Thutkhawm kaihruaitu DoNER Minister chuan hemi chungchang hi uluk zawka sawipui turin MP K. Vanlalvena hi a sawm bawk a ni.