Serchhip Town Piggery Cooperative Society Ltd. te Vawkchaw herna hmun DCO in a hawng

Serchhip Town Piggery Cooperative Society ten Vawkchaw herna In leh khawl an bun thar chu nimin khan Serchhip District Cooperative Officer L. Lalzidingi chuan a hawng.
Serchhip P&E Veng-a Vawkchaw herna In leh khawl hawnna hunah hian DCO L. Lalzidingi chuan he khawl bun a nih theihna tura Serchhip Town Piggery Cooperative Society te hmalakna chu lawmawm a tih thu a sawi a. He khawl In leh khawl bun a nih theihna tura hmalakna te tarlangin, Serchhip District-ah hian Pradhan Mantri Janjatiya Vikas Kendra (PMVK) hnuaiah Phase I leh II kalpui ni tawhin tuna Phase-V kalpui mekah he hmalakna hi kalpui a nih thu a sawi a. PMVK hi tunah chuan Pradhan Mantri Janjatiya Vikas Mission (PMJVM) tia thlak a nih tawh thu leh he Scheme hmang tangkaitu hi Society 24 an awm mek thu te, Self-Help Group 20 ten Van Dhan Vikas Kendra din Kawlri VDVK hnuaia awm Serchhip Town Piggery Cooperative Society Ltd. chu he Scheme hmangtu zingah telin, 1st Installment chauh an la hmu chunga tun dinhmun an thleng thei chu an hruaitute leh member te thawhhona tha tak vang a nih thu a sawi a ni.

Serchhip DCO chuan tuna an hawn tak ranchaw herna tur khawl hi Chhingchhip, East Lungdar leh Thenzawl-ah te pawh an pek thu sawiin, hmun thenkhat ah chuan an la bun loh laiin Serchhip-a an pek hawn theih a ni ta chu lawmawm a tih thu a sawi a. He hmalakna hnuaiah hian 2nd Instalment hmuh thuai beisei a nih thu pawh sawiin, chumi hunah chuan an mamawh dang pawh changtlung zawka inpek leh ngei pawh an tum tih a sawi a. He hmalakna hi an thil tharchhuah te hralh theih tura mawi taka sawngbawlna tur te a nih thu a sawi bawk.

Nimin-a hawn tak Vawkchaw herna In sakna atan hian Serchhip P&E Veng-a Soil & Water Conservation Department ram chu sawrkar htiatpuina a hawh niin DRDO Serchhip hnen atangin a In sakna tur hi MGNREGS hnuaiah cheng nuai thum (3) hmuh niin Bialtu MLA hnen atangin GiA cheng nuai thum bawk hmuh a ni a. Ranchaw herna khawl hi Pradhan Mantri Janjatiya Vikas Mission (PMJVM) atanga sum hmuh cheng nuai 5 senga lei ni bawkin he khawl-ah hian Vaimim her tura ruahman a ni a, thildang an pawlh hmangin Archaw leh Vawkchaw te her theih tura ruahman a ni.

Serchhip Town Piggery Cooperative Society Ltd. ten Vawk Chaw Herna In leh Khawl an neih thar hawnna hun hi an Society Chairman K. Remlalliana chuan kaihruaiin Vice Chairman Lalrinzuali chuan hunserh a hmang a. Serchhip Town Piggery Cooperative Society Ltd. hi October 27, 2020 khan ding tanin Cooperation Department-a register an ni a, tun dinhmunah member 66 an awm mek a ni.