School Education Minister in tlangzarh

SCERT buatsaih Mizo tawng Braille lam tawi (Braille Contraction) leh Indian Sign Language hmanga Mizo thumal 365 awmna video chu Education Minister Dr. Vanlalthlana’n a tlangzarh.

SCERT Auditorium, Aizawl-a hemi puala hun hman ah Education Minister chuan Mitdel hawrawp lamtawi leh Standard Indian Sign Language-te chu Mizoram a zirna hmasawnna kawngah pawh mellung pawimawh tak an nih ngei a beisei thu a sawi a. Sawrkar ang pawhin Vohbikte chu an ngaihsak hle thu sawiin,  NEP 2020 in a phut angin Special Education chu  an ngaih pawimawh chhoh  zel tur thu a sawi bawk.

Mitdel hawrawp hi International Standard size a nih avangin hawrawp pangngai anga duh ang anga lian leh te a ziah danglam theih a ni ve lo a, ziak leh chhiar chhung a reiin, lehkhapuan pawh hman teuh a ngai thin a. Mitdel hawrawp, Mizo tawnga Braille hmangtuten awlsam leh rualkhai zawka an hman theih turin Directorate of State Council of Educational Research and Training (SCERT) chuan Mizo tawng Braille lamtawi (Braille, Contraction) hi a buatsaih ta a ni.

India rama Sign language hmangtu Special School leh a dangte Sign hman dan hi a inang lo hlawm hle a. Hei hi SCERT chuan a vei hle bakah National Education Policy 2020 chuan  India ramah Sign language ang khat hmang tura a lo tih bawk avangin Mizo tawng thumal 365 hmangin he sign language video hi siam a ni a. Heng video hi SCERT Official Youtube Channel ah dah a ni a, sign language inang tlang hman a lo nih theih nan leh beng ri hriatna lama harsatna nei tu pawhin kan biak theihna turin heng video te hi a tangkai hle dawn a ni.

Mizo Standard Braille Contraction leh Standardized Indian Sign Language Video tlang-zarhna hun niminpiah a neih hi SCERT Director Caroline Zoramthangi chuan a kaihruai a ni.