Khawbung RD Block kum 25 tlin lawmna neih a ni

Khawbung RD Block kum 25 tlinna, Silver lawmna chu nimin khan neih niin RD Minister Prof. Lalnilawma chuan a hmanpui a ni.

Khawbung RD Block Silver Jubilee lawmna ah hian RD Minister chuan Khawbung RD Block-in Silver Jubilee an lawm thei chu ropui a tih thu a sawi a. Kum 2000 atangin Rural Development kaih-hnawih hna hrang hrang a lo thawh tawh thin thu sawiin, heng hun chhung hian sawrkar laipui leh State sawrkar chuan thingtlang mite hmasawnna turin Scheme tha tak tak a kalpui thin tih a tarlang a. Khawbung RD Block-in kum 25 a lo tlin takah chuan Scheme kalpui tawh te leh Scheme kal mek te thlir chungin kan dinhmun leh kan hmabak engtin nge kan kalpui ang tih kan inzawh thar fo a tul tih a sawi a. Sawrkar Department-te chu hma-sawnna hna thawh kawngah an tanho thiam a pawimawh thu pawh sawiin, mipui ten eizawnna mumal an neih theihna lam hawi zawnga hmalak thiam a tul tih a sawi bawk.

Khawbung RD Block Silver Jubilee lawmna hun hi HB. Lalnuntluanga chuan kaihruaiin BDO Lalchhandami Pachuau chuan in lawmna thu a sawi a, RD Department-a Joint Director Vanlalrova chuan Silver Jubilee puala buatsaih Souvenir tlangzarhin Tuipuiral VC Association President C. Lalrintluanga pawhin Khawbung Block hnuaia VC te aiawhin thu a sawi a, Henry Zonunmawiq hnen atangin Khawbung RD Block chanchin ngaihthlak a ni bawk.

Khawbung RD Block hi East Lungdar RD Block hnuaiah awm thinin June ni 20, 1995 khan Additional Block-ah hlankai a ni a. November ni 26, 1999-ah Block puitlingah hlankai niin Vawiin thleng hian Addl Block Development Officer (ABDO) 2 leh BDO 16 an awm tawh a. Khawbung RD Block hnuaiah hian khaw 25 awmin BDO hovin Staff 44 an awm mek a ni.