Ramsa kah leh awh kaihhnawih ah man an ni

Ramsa kah leh awh kaihhnawih ah tunhnai khan mi thenkhat te chu man an ni.

Lawngtlai District Mampui khuaa loneitu pakhat chuan kar kalta Nilaini khan a Thlam bulah Sanghal a awl tih hriain Forest Department chuan an chhui zui a, Sanghal awktu hnen atang hian Sanghal Sarep hrang 26, Sanghal lu leh a ke pathum man sakin Deputy Conservator of Forest, Chhimtuipui Wildlife Division, Lawngtlai chuan The Wildlife Protection Act 1972 tlawhchhanin Sanghal awktu hi Rs. 20,000 a chawitir bawk a ni.

Zirtawpni zan khan Bairabi Chhim Veng Branch YMA duty te hnen atanga thu dawn bawhzuiin Bairabi bul Tlawng kam, Kheva kaiah mau sat a inhlawh thin ni a in sawi Chakma pathum hnen atangin Bairabi Forest Range hnuaia thawktute chuan Sakhi ruang, a taksa a silaia kahna hnuhma awm an man bawk a, hemi kaihhnawih ah hian Sakhi kaphlumtu ni a puh mi pathum te man an ni bawk a, an lakah hian Criminal Complaint thehluh niin Magistrate thupek angin heng mi pathum te hi Kolasib District Jail-ah dahluh nghal an ni bawk. Sakhi hi ramsa humhalh, Schedule-I niin hetiang ramsa laka Dan bawhchhetu chu kum 3 (kum 7 thleng pawhsei theih) Jail tang tur leh Rs. 25,000 aia tlem lo chawi tira hrem theih an ni.