Kum 5 chhungin Aizawl khawpui ah lirthei chesual vangin mi 82 an thi tawh

Aizawl khawpui chhungah tunhnai kum nga, 2020-2024 chhungin lirthei chesual a thi mi 82 an awm a. Traffic dan bawhchhia man hnem ber chu Two Wheeler niin kumin chhunga dan bawhchhia lirtheite pawisa chawi tlingkhawm chu Rs. 60,37,002 a tling tawh.

Aizawl Traffic Police-te chhinchhiah danin kum 2020-ah lirthei chesuala thi mi 14 awmin hliam tuar mi 15 an awm a. kum 2021-ah nunna chân pariat leh hliam tuar 14 an awm bawk. Kum 2022-ah nunna chân 23 awmin hliam tuar 24 an awm a, kum 2023-ah nunna chân 16 leh hliam tuar 22 an awm a. Kumin 2024 chhungin nunna chân 21 leh hliam tuar 10 an awm leh tawh bawk a ni.

Traffic Police ten Dan bawhchhia lirthei man zingah Two Wheeler tam berin, nikum chhung khan dan bawhchhia Two Wheeler 9,283 man an awm a, kuminah 6,042 man an awm leh tawh bawk a. Two Wheeler dawtah hian LMV leh Taxi chu dan bawhchhia man tam zualte an ni. Nikum chhunga dan bawhchhia lirthei man zawng zawng zat chu 12,102 niin, an pawisa chawi tling khawm chu Rs. 85,94,912 a tling a, kuminah lirthei 8,669 man awm leh tawhin an pawisa chawi tlingkhawm chu Rs. 60,37,002 a tling tawh bawk.

Kumin chhunga lirthei zinga dan zawm lo man tam ber chu MV rules zawm lo niin 3,911 man an awm a, lirthei dah phal lohna hmun (No Parking Area)-a dah 1,895 man an awm bawk a. Lirthei khalh laia mei zu 16 man bawkin, midang tana hlauhawm khawpa lirthei khalh mi 10 man an awm bawk. Heng bakah hian helmet khum loa lirthei khalh 199 man bawkin insurance nei lo 64, driving licence nei lo 178 man an nei bawk.