PSU te chhawr tangkai theih inbeiseiin sawrkar in a tuai nung thar leh - Home Minister

Zonuna Kawlni (LENKAWL) • December 4, 2024 • Comments • Mizoram

Home Minister K. Sapdanga chuan Public Sector Undertaking (PSU) te chu sawrkar hmasa lamin an lo beidawnpui deuh tawh nimahse ZPM sawrkar chuan chhawr tangkai theih inbeiseiin an han tuai nung thar leh tih sawiin, hlawhtlinna chu taihmakna leh rinawmna ah a awm thu a sawi.

ZOHANDCO buatsaih ‘Hathkargha Mela-State Handloom Expo’ hawnna nimin-a Kolasib Taitesena Hall-a neih ah Home Minister K. Sapdanga chuan Sawrkar chuan mipuiten mahni kutkawiha eizawnna an neih theih nana tanpuitu atan PSU thenkhat te chu a kaitho leh tih sawiin, “Public Sector Undertaking (PSU) te hi sawrkar hmasa lamin an lo beidawnpui deuh tawh nimahse ZPM sawrkar chuan chhawr tangkai theih inbeiseiin kan han tuai nung thar leh a ni a, PSU te hi sum thawhchhuak turin kan beisei thin a, amaherawh chu sum thawhchhuaktu ai mahin mihring intodelh tir (self employment) ni thei tura midangte tanpuina a tur a ni,” a ti.

ZPM sawrkar chu mi thenkhat tan chuan a hneawm mai thei tih pawh sawiin Home Minister chuan, “Kuthnathawh leh intodelhte kan sawi uar thin a, leilung nena inzawm, leilung hausakna haichhuah leh chhawr kawnga hmasawn kan duh a. Tunah pawh kan buaipui ber chu 'Bana Kaih Policy' a ni,” tiin “Kan Chief Minister kaihhruaina hnuaiah nasa takin hma kan la mek a, Bana kaih theih turin mipuiten kan ban kan lo phar chhuah ve a ngai dawn a ni,” a ti a. Sawrkar in thlai thar a buaipuina chhan ah sum leh pai dehchhuah leh hlawkna chu a pahnihna a nih thu sawiin, “A pakhatna chu mahni kut ngei hmanga intodelh hi a ni. Chu chuan kan thalaite rilru ah rilru dik tuh se la, kutdawh rilru ni lo, intodelhna rilru an put hi kan duh ber a ni,” a ti bawk.

Sawrkar in hna hrang hrang a lakah Group D hna lakah MA leh BA degree nei dil te pawh an awm thu sawiin, “Hei hian a entir chu hlawhtlinna hi zirna ah a awm ber bik lova, taimakna leh rinawmna ah a awm a ni,” a ti bawk.

State Handloom Expo - Hathkargha Mela hi tun thla ni 18 thleng neih tur niin Mizo kutchhuak puan leh inthuamna lam chi te phochhuah a ni.