MPCC in changtlung zawka NLUP kalpui leh tum

Mizoram Pradesh Congress Committee (MPCC) President Lal Thanzaran inthlan lehah an sawrkar chuan Oil, Buhfai leh Chhiah uchuak taka tihsan an ennawn leh vek dawn tih sawiin, NLUP chu mithiam zawkte râwnin changtlung zawkin an kalpui leh ngei dawn tih a sawi.

Nimin-a MPCC Special Assembly Aizawl-a neihah MPCC President Lal Thanzara chuan ZPM sawrkar chuan an enkawl mipuite Oil man leh chhiah te, buhfai man te an tihsan khum nia sawiin, “An ni hlawh leh hamthatna hrang hrangin an inhaivur leh si a ni,” a ti a. Flagship Programme chu anmahni duanchhuah a ni lo nia sawiin, “Central Scheme awmsa a ni,” a ti a, he Scheme hi nawlpui, lehkhathiam lo leh pianphunga rualban lo te tan chuan tum chhin chi pawh a ni meuh lo a. Thiamna neih ngai, project siam ngai a ni zel a ni, a ti bawk. 

ZPM chu an insawi angin an kal lo nia sawiin Lal Thanzara chuan, “Inrenchemna kalpui anga insawiin tul lovah hna an siambelh avangin cheng vaibelchhe sawm tel an senbelh mek a. MLA Fund te tul lovah an tisang a, kumtin cheng vbc. 80 lai an seng dawn,” a ti a. Tuna VC inthlan an sawn hma pawh hi mipui kutthlakna zah lohna nasa tak, Democracy palzutna niin a sawi a, “Mipui rilru ah an hniam tial tial a, Sawhthing hralhna tha an hmu dawnin a lang si lova, Rulling VC neih tlem an hlau si a, heti hian an che ta niin a lang,” a ti a. Congress party chuan Mizoram-ah ro an rel rei ber a, Development pawh Mizoram tan an thlen hnem ber niin a sawi bawk.

Nimin-a MPCC Special Assembly hi Sr Vice President Lalnunmawia Chuaungo chuan a kaihruai a, kalkhawmten Resolution siamin, NLUP kalpui leh an tum thu te leh Mizoram Lokayukta thuamchaka thuneihna sang zawk pe turin hmalak an tum tur thu te an sawi a ni.