Education Minister in MSTA Conference a hmanpui

Mizoram Middle School Teachers Association (MSTA) chuan nimin khan General Conference neiin he hun hi School Education Minister Dr. Vanlalthlana chuan a hmanpui a ni.

Baptist Centre, Falkland, Aizawl-a Mizoram Middle School Teachers Association (MSTA) General Conference-ah hian Education Minister chuan Middle School zirlaite chu uluk lehzuala enkawl an ngaih hun lai tak a nih thu sawiin, “A tlangpuiin kan zirlai naupangte hi kum 10 atanga kum 14 inkar chho an ni a. Hemi kum chhovah hian an rilru nasa taka a danglam avangin zirtirtute chu an hringnun kaihruaitu an nih a ngai a. An dilchhut (curious)-in an suangtuahna (abstract thinking) an hmang thiam chho a. A tha lama an ngaihtuahna an sen thiam nan an dilchhutna leh an suangtuahna hman an thiam tharna chu kan kaihhruai a pawimawh em em a. An zawhna tha tak leh dik taka chhansak an ngai thin a. Taksa lamah puitlin lam an pan chhoh avangin hormonal change leh mood swing te an nei chho nasa a, duat taka kan enkawl thiam te pawh a ngai viau a ni,” a ti a. An zirlaite chu Digital exposure an neih chhoh tak tak hun a nih bawk avangin Smartphone leh Social Media hman dan te pawh uluk taka hrilh hun lai tak a nih thu sawiin, “Zirlai zirtirtu ringawt kan ni lo a, hringnun zirtirtu kan ni tel a ni tih kan hriat thar ka duh a. An academic career kaihruaitu kan nih piah lamah, an Life career kaihhruaitu pawimawh tak kan ni,” a ti bawk.

School Education Minister chuan Zirtirtute tan intuai thar reng a ngaih thu pawh sawiin, “Class kan zirtir leh naupang kum kan enkawl chu a ngai deuh reng a nih pawhin generation an danglam ang zelin thil a danglam thin a. 21st Century khawvelah hian khawvel hmasawnna hi a kal chak em em a ni,” tiin Mizo zirlai ringawt ni lo, India State dang leh ram danga zirlaite aia kan zirlaite an hnufual bik loh nan zirtirtute chu kan intuai hriam thar a ngai tih an hriat a ngaih thu a sawi a. Zirtirtu a nih anga a ngaih pawimawh em em Conceptual clarity (a bulthum man), critical and creative thinking (thil chikna leh ngaihtuahna danglam hman thiamna) leh, chumi puan chhuah thiamna (communication skills) chungchang pawh Minister hian a sawi bawk a ni.

Nimin-a MSSTA Conference hi chawhma lamah Vice President S. Rochama chuan kaihruaiin General Secretary C. Lalchhanhima hnen atangin report ngaihthlak a ni a. MSSTA ah hian member 2094 an awm mek a. Kumin khawmpuiah hian an member boralta te sunna hun hman a ni bawk. Chawhnu lamah an pawl President Rosangzuala Ralte kaihhruaiin rorelna hun hmangin hmalakna tur hrang hrang an rel a, Mizoram Teacher Federation hruaitute kaihhruaina in an pawl hruaitu tur thlanna neih nghal a ni bawk.