Regional SARAS Fair 2024 RD Minister in a hawng

Mizoram State Rural Livelihood Missions (MzSRLM) buatsaih 10th Regional Sales of Rural Artisans Society Fair (SARAS) Fair 2024 chu nimin khan The Terrace Restaurant, Aijal Club-ah RD Minister Prof. Lalnilawma chuan a hawng.

Regional SARAS Fair, 2024 hawnna hunah hian RD Minister chuan SARAS Fair thil tum ber chu Self Help Group-te thil tharchhuah, hralhchhuah leh mipui hmaa pholanna remchang zawn a nih thu sawiin, amah ngei pawh Mizoram a Self-Help Group bul tantute zingah a tel thu leh an hmasawnna a hmuhin ropui a tih thu a sawi a. SHG te chu Bank nena inthlunzawm tura ruahman an nih thu sawiin, Public Sector Bank nena inthlunzawm SHG 347 a awm thu sawiin, loan an lak tawh zat chu cheng nuai 568 a ni tawh a, Mizoram puma SHG te Revolving Fund chu cheng vbc. 15 vel a nih thu a sawi bawk.

SARAS Fair hi MzSRLM bultumin kum 2015 atang khan neih an a ni a. Kumtin State Capital leh District Headquarters a neih thin tura ruahman a ni a, Covid hripui leng leh inthlanpui ten a khaihlak tum tih lohah chuan tluang taka neih thin a ni. SARAS Fair 2024 hi SARAS Fair vawi 10 neihna a ni a, December ni 10 atanga ni 16 chhung neih tur niin Mizoram hmun hrang hranga Self Help Group ten Stall 49-ah an thilsiam te an phochhuak a ni.

MzSRLM hi National Rural Livelihood Mission hnuaiah kum 2013 khan din a ni a, a tum ber chu thingtlanga cheng chhungkaw harsa zawk te Self Help Group (SHG) hmanga khaichhuah leh retheihna an kalsan hma tanpui a ni. MzSRLM hian Mizoram District 11-a RD Block 28 te a tuamchhuak vek tawh a, khaw 706-ah SHG 10,425 ding tawhin, SHG hnuaiah hian chhungkaw 81,829 an inziaklut tawh a, SHG-te khaikhawm tur hian Village Organisation 791 leh Cluster Level Federation 84 din a ni tawh bawk.