Dan bawhchhia damdawi dawr 41-te license cancel

Sawrkar kum kalta, 2023-24 chhung khan Mizoram-ah damdawi zawrh phalna nei mi 41-te license chu cancel niin suspend mi panga an awm a. Food & Drugs Administration (F&D) chhinchhiah danin drugs license cancel-sak mi 41 zingah hian an license renew loh vanga cancel-sak an awm laiin, dan bawhchhiat vangte-a cancel an awm bawk.

F&D chuan drugs license neitute chu insawifiah tura hriattirna a pe thin a, chunga an insawifiahna a pawm lohte chu ‘Rule 66 of Drugs & Cosmetics Rules, 1945’ tlawhchhanin a cancel a, license cancel-te chu an license hmanga damdawi kawl leh zawrh phalsak an ni tawh lo.

Kum 2023-24 chhung khan F&D hian damdawi zawrhna vawi 1,115 an endik a, damdawi tha a nih leh nih loh enfiah 143 neiin, panga te chu damdawi tha lo (standard quality phak lo) a ni tih finfiah an ni.

Drugs license hi fimkhur leh uluk taka Drugs & Cosmetic Act, 1940 & Rules 1945 hnuaia pekchhuah a ni a, a neituin a zawrh emaw, a hralhchhawn emaw hi khap tlat a ni a. Department hotute chuan license lei chhawng emaw, zuar chhawng emaw hriat a nih chuan license cancel sak nghal tur a ni tih an sawi.