Mipuiin PM Vishwakarma hlawk taka an hman theih nana theihtawp chhuah turin chah

Kutthemthiamte tanpui nana sawrkar laipuiin ruahmanna a siam, PM Vishwakarma chu mipuiin hlawk taka an hman theih nan mipui hrilhhriat kawngah theihtawp chhuah turin Chief Secretary Khilli Ram Meena chuan Department te a chah.

Aizawl Sipai Lammual-a buatsaih PM Vishwakarma Exhibition-cum-Trade hi Inrinni khan zawhfel niin a kharna hun hi Chief Secretary Khilli Ram Meena chuan khuallian niin a hmanpui a, Chief Secretary chuan PM Vishwakarma thil tum chu a hlawhtlin theih nan leh hmun kilkhawr zawk a thlen theih nan theihtawp chhuah turin thawktute a chah a. Mahni kutkawiha eizawnna bul tan duhte pui turin Bank hrang hrang te pawhin Loan hmanga theihtawp an chhuah a ngai tih sawiin, hmasawn tumte pui turin a chah a. Bul tan mekte mamawh leh pawimawh zingah tharchhuah hralhna tur ngaihtuah a tul hmasa tih sawiin, theihtawp chhuahpui tura Department-te hrilhin sawrkar leh mipui thawhhona tha awm tura tan la thar theuh turin a chah bawk.

PM Vishwakarma Exhibition-cum-Trade hi November 28-20, 2024 chhung khan neih niin PM Vishwakarma hi nikum 2023 September thla a Prime Minister Narendra Modi-a’n a tlangzarh kha a ni a. He Scheme hi Central Sector Scheme niin, Sawrkar laipuiin a bultum a ni a. Kut themthiamna kawng hrang hranga thilsiam chhuak, thiamna nei te bultanna leh hma an lak zelna tur atana tanpuina leh khaichhuahna atana a bik tak a duan a ni a. Kum 5 chhung (2023-2024 atanga 2027 – 2028) thleng tura duan a ni a. Ministry of Micro Small and Medium Enterprises (MoMSME), Minstry of Skill Development and Entrepreneurship leh Department of Financial Services te thawhhona hnuaia kalpui a ni.

PM Vishwakarma Scheme hi Mizoram-ah pawh kalpui niin Commerce & Industries Department chu Nodal Department niin, MSME DFO te nen hian an thawkho a, hrechiang duh chuan Project Management Unit (PMU) C&I Department leh Secretariat of C&I, MINECO lamah te ngaihven theih reng a ni a. Mizoram atang pawhin he Scheme hnuaia Loan application engemawzat a awm tawh a, mi pali hnenah sanction a ni tawh a, tun tum Exhibition-cum-Trade Fair ah pawh hian mahni kutthemthiam thil phochhuak mi 41 an awm a, an zavai hian Certificate leh Memento hlan vek an ni bawk.