Raltlan te dahkhawm turin ruahmanna siam mek

Mizoram sawrkar chuan ramchhunga raltlan awmte darhsarh taka an awm mek chu tha a tih loh avangin sawikhawm dan tur a dap mek.

Hemi atan hian Mizoram sawrkar chuan Adviser to Chief Minister (Political) Lalmuanpuia Punte MLA kaihhruai Study Team a din tawh a, he Study Team hian Mizoram hmun hrang hranga raltlante dinhmun zirchiangin a tlawhkual tawh a. Bangladesh atanga raltlan mi 2,014, Lawngtlai District chauh a awmte chu khaw 4-ah an awmna tur ruahman fel a ni tawh a ni. An dahkhawmna hmun tur hi Bangladesh dep lam khuate a nih thu Lalmuanpuia Punte chuan sawiin, Parva, Damdep-II, Cherluitlang leh Saizawh khua-ah te dah tura ruahman a nih thu a sawi a, hemi hnuah khaw dang pakhat rawtna a awm leh avangin ngaihtuah leh mek a nih thu a sawi bawk. Myanmar atanga raltlanho awmna hmun hrang hrang an tlawh thu leh an awmna sawikhawm an tum dante an zirchian thu Lalmuanpuia Punte chuan sawiin, Myanmar raltlante hian an ram sipai sawrkar chu a tlu hnai mai dawn a ngaihna an neih tlat avangin insawn kual vel lam an ngaihven vak lova, an khua theuh a kir leh thuai theih an inring nghet hle niin a sawi bawk.

Manipur atanga sahimna zawnga lo lutte pawh kir chho leh thei vek tawh ah an inngai hlawm tih an lo hrilh niin Lalmuanpuia Punte chuan a sawi a. Chuvangin la ngaihtuah nawn leh a sawrkar a thumum leh rawtna fumfe thehluh thuai theih an tum thu a sawi bawk a ni.