Kuthnathawktute thlai thar lei dan tur inhrilhfiahna Serchhip-ah neih a ni
Serchhip Multipurpose Farming Society General Assembly-ah hian District Bawrhsap leh District Agriculture & Marketing Committee (DAMC) Chairman Paul L. Khuma chuan District Agriculture & Maarketing Committee (DAMC) awmzia leh a hnathawh te sawifiahin, District Adminsitrator a nihna angin Sawrkar Flagship Programme pawimawh tak 'Handholding policy' hmanga thlai thar hralhna chu a hlawhtlin ngei theih nan theihtawp chhuahpui turin Society member kalkhawmte chu a sawm a. Hemi atana inkaihhruaina, Standard Operation Procedure (SOP) sawrkar in a siam chu hrechiang hle tura Society Member kalkhawm te chu chahin, Serchhip District chhung khaw hrang hrang 39-ah Multipurpose Farming Society din anih tawh thu leh Primary Collection Centre tin atanga kuthnathawktu ten Sawrkar atanga Subsidy/Support Price hmu tura an thlai tharte phurhkhawmna hmun tur, Secondary Collection pawh buatsaih a nih thute a sawi bawk.
Serchhip Multipurpose Farming Society Chairman R. Zapuithanga kaihhruai he hunah hian Agriculture & Farmer Welfare Department-a Deputy Director K. Laltlanmawia chuan thlai thar lei tur chungchang ah hian SOP in a sawi angin khaw pakhat ah Society pakhat zel din tur anih thu sawiin, SOP hi kum khat atan zela ennawn leh tih danglam theih a nih thu a sawi a, tuna Multipurposes Farming Society hi thlai thar hralh buaipui tura din a nih thu te, Primary Society te tihtur leh hriattur hrang hrang te, Thlai tharte chu Auction/Tender leh tur anih avanga fai tha taka sawngbawl tur leh Primary Collection Centre, mahni kawtkai ah Rs. 50 aia sanga hralh theih anih chuan sawrkar chu a inrawlh kher dawn loh thute sawiin, amaherawh chu Society Member ten Rs. 50 aia sang-a an hralh theih loh chuan Secondary Collection Centre (Auction/Tender Centre)-ah sawrkar Support Price hmu thei tura phurhluh tur anih thu leh chu chu DAMC-ah report anih hnuin Mizoram Agriculture Marketing Board (MAMB)-ah thlen anih hnuin Support Price pek theih chauh a nih dawn thute a sawi a. Primary Collection Centre atanga Secondary Collection Centre a Sawhthing phurhna man (Loading, Un loading leh Transportation) Charge/Service Charge chu thlai hralhtute hnen atanga lak tur anih thu leh Society member dik tak, Document felfai tak neite chauhin Subsidy/Support Price an claim theih dawn avangin Mizoram Agriculture Marketing Board ten khaw tina Multipurpose Farming Society Treasurer theuhte Document chungchangah hian zirtirna pek leh an nih dawn thu a sawi bawk.
He hunah hian Serchhip DHO R. Lalrintluanga pawhin Serchhip Bial chu Chief Minister Bial a nih ang ngeiin Bial dangte tana entawntlaka thlai thar chu fai tha taka hralh tum turin he huna kalkhawmte chu a chah a. Sawh-thing chingtute pawh an thlai chin te hausakpui ngei turin duhsakna a hlan a. District Cooperative Officer Lalzidingi pawhin Society kalphung leh awmzia te he hunah hian sawiin, Registered Co-operative Society ni chho zel tura kal zel dan turte a hrilhfiah bawk a ni.
Nimin-a he hun hman ah hian Serchhip Multipurpose Farming Society-a Secretary Johny Lal-chhuanmawia chuan an kalphung leh dinhmun te Report pein a tarlang a. Serchhip Multipurpose Farming Society-ah hian tun dinhmun ah Member 350 vel awm mekin, chung zingah chuan chhungkaw 260 in ram hectare 125 a zau ah Sawhthing quintals 1514 an ching a, heng atang hian Sawhthing quintals 70,000 chuang thar an inbeisei mek a ni.