Vawiin-ah YMA Volleyball khelh tan a ni dawn
Serchhip Sub-Hqrs. YMA hnuaia YMA Branch hrang hrangte Volleyball-a inelna tur hi Serchhip Sub-Hqrs. YMA President Kawlthuama chuan hawngin Sub-Hqrs. YMA Sports and Recreation Committee in YMA Branch hrang hrangte tana Volleyball a inelna tur an buatsaih chu lawmawm a tih thu a sawi a. He Tournament hi nikum lam atanga inbuatsaihna kalpui a nih tawh thu sawiin, sum mamawh te duh anga hmuh mai theih a nih loh hnuah Bialtu MLA in sum a pek hmangin a hlawhtlinna hmuh theih a ni tur chu lawmawm a tih thu a sawi a. He Tournament hi Branch YMA Member te intihphurna leh inpawhtawnna atan hman ni thei se a duh thu a sawi bawk.
Nizan a he Tournament khuh hawnna hun Serchhip Sub-Hqrs. YMA Conference Hall-a neih hi Sports and Recreation Committee Chairman Kaptluanga Ralte chuan kaihruaiin Serchhip District Volleyball Association President K. Tlangthanmawia pawhin infiamna chi hrang hrang zingah Serchhip Sub-Hqrs. YMA in YMA Branch te inelna tura Volleyball an thlang chu lawmawm a tih thu a sawi a. Tunhma lam pawhin YMA nen hian Volleyball inelna an lo buatsaih tawh thu sawiin, YMA Member te inkarah thawhhona tha zawk thlentu ni tura hlawhtling taka khelh a nih ngei a beisei thu a sawi bawk a ni.
Inter-Branch YMA Volleyball Tournament ah hian Serchhip Sub-Hqrs. YMA hnuaia Branch hrang hrang atangin Team 38 an tel dawn a, heng te hi Mipa-ah YMA Branch 24 leh Hmei-chhia-ah Branch 14 an ni a, tunkar Inrinni khian Final khela zawhfel hman tum niin tukin dar 9:00 hian Court hrang hrang pali-ah khelh tan tura ruahman a ni.