Serchhip-ah World AIDS Day pualin HIV/AIDS vei te puala Dan siam zirho a ni

Kumin December 1-a ‘World AIDS Day’ pualin nimin khan Serchhip-ah hun hmangin damlo enkawlna kawnga thawktute tan ‘The HIV and AIDS (Prevention and Control) Act, 2017’ chungchang zirhona neih a ni.
World AIDS Day puala Serchhip CMO Conference Hall-a he hun hman hi Serchhip District Medical Superintendent Dr. ZD. Lalmuanawma chuan kaihruaiin he hun hmanpuitu Serchhip Addl. DC Lalrinzuala chuan kawng hrang hrangah mipui ten kan tih tur leh tih loh tur kan hriat a ngai tih sawiin, Dan hriat lohna chuan Court-ah thiam min chantir theih loh avangin Dan kan hriat a pawimawh thu a sawi a. Mizo khawtlang nun-ah HIV/AIDS kai ten endawng an la hlawh tih sawiin, hei vang hian mahni dinhmun hrechiang tura thisen enfiah tir tur pawh an la tlem thu a sawi a. HIV/AIDS chungchang ah hian Mizoram dinhmun chu a tha lo hle tih sawiin, thalaite zingah HIV hrik kai an tam thu leh hei hi kan Hnam tan a him loh thu a sawi a. HIV/AIDS laka kan dinhmun a ziaawm theih nan HIV hrik pai te hriatchhuah zung zung a pawimawh a, hemi tur hian HIV/AIDS kai te endawng mai lova kan pawm thiam a pawimawh thu sawiin, HIV hrik kai zingah an thiamloh leh dik loh vang ni miah lo thlenga kai an awm avangin an dinhmun hrethiam tak chunga HIV/AIDS vei mek te kan dawnsawn thiam a pawimawh thu a sawi bawk.

He hunah hian Mizoram State AIDS Control Society (MSACS)-a Deputy Director Dr. Lalnunhlima Khiangte chuan kumtin December 1-ah World AIDS Day hi hman thin a nih thu sawiin, kumin hian mipuite hnena HIV/AIDS chungchang zirhona bakah heng hri kai mek te leh kai hlauhawm dinhmun a ding te enkawlna hmuna thilpek hlana hun hmang tura ruahmanna an siam thu a sawi a. HIV hri kai te enkawlna kawngah Damdawi In leh mipuite hriselna kawnga thawktu ten Dan an hriat a pawimawh thu sawiin, nimin-a he hun hman ah hian Assistant Public Prosecutor Lalrosanga Colney ‘The HIV and AIDS (Prevention and Control) Act, 2017’ chungchang ah kalkhawmte zirtirna a pe bawk a. Serchhip-a Sr. Chief Medical Officer Dr. LP. Malsawma chuan lawmthu sawiin hun a khar a ni.

World AIDS Day 2024 pual-a hun hman ah hian ruihhlo ngai te enkawlna hmun, Faith Home, Chhingchhip leh Adult Rehabilitation Centre (ARC), New Serchhip-ah te MSACS chuan an mamawh Buhfai, Alu, Tel tel thildang te an hlan nghal bawk a ni.