Progress Partner thlan chungchang sawiho

Mizoram State Policy Coordination Committee chu nimin khan thukhawmin Progress Partner thlanchhuahna kawnga sawt zawka hmalak dan tur sawiho a ni.

Planning & Programme Implementation Department Conference Hall-a Mizoram State Policy Coordination Committee thutkhawm ah hian Bana Kaih Scheme hnuaia Implementing Department atangin Nodal Officer te an tel a, Adviser to Chief Minister (Implementation of Hand Holding Policy) leh MSPCC Vice Chairman KC. Lalmalsawmzauva chuan he thutkhawm hi kaihruaiin Mizoram tihhmasawnna tura thiamna leh theihna nei, thawhpui tur, Progress Partner thlanchhuahna kawng a Nodal Officer-te hmalakna leh inpekna ah lawmthu a sawi a. Ram tan a hmasawnna thlen thei tura theihna nei, mi hlawhtling ngei tur thlanchhuah hna chu phur tak leh uluk tak si a thawk zel turin a ngen bawk a ni.

He thutkhawmna hian Progress Partners thlanchhuah kawnga Nodal Officer-te pui thei tur, Assessment Sheet duan thar chu a hman dan tur en ho a ni a. Progress Partners-te dilna mil a loan ruahman theih, Commerce & Industries, Animal Husbandry & Veterinary Department, Agriculture & Farmers Welfare Department, Fisheries leh Horticulture Department hnuaia Scheme hrang hrang awmte zirho a ni a. State Bank of India, Mizoram Rural Bank leh Mizoram Cooperative Apex Bank hnuaia Loan Scheme hrang hrang tarlanna hun hman niin Credit Guarantee Fund Trust for Micro & Small Enterprises leh Mizoram Credit Guarantee Scheme chungchang te zirho nghal a ni bawk.