Cooperative Movement a pawimawh thu sawi

Cooperation Minister PC Vanlalruata chuan thingtlang hmasawnna turin Cooperative Movement a pawimawh thu a sawi.

State Level Campaign - ‘Cooperation Among Cooperatives’ hawnna hun SIRD Campus, Durtlang-a nimin-a neih ah he thu hi sawiin Cooperation Minister chuan Mizoram in Cooperative coverage huang zauh theihna nasa tak a neih thu leh tunah hian Coverage 4% vel a nih thu leh hmarchhak State dangah chuan 12-26% vel daih a nih thu a sawi a ni. Minister hian Ministry of Cooperation hnuaia hmalakna hrang hrang tarlangin, ram pumah Multipurpose Primary Agricultural Cooperative Society (MPACS) nuai 2 chuang din a nih dan te, Mizoram chhunga thingtlang khaw 750 ah te a vawikhatna atan MPACS din tura hmalak a nih dan te a tarlang bawk a ni.

‘Cooperation Among Cooperatives’ hawnna hun hi NABARD, Mizoram Regional leh Mizoram sawrkar-a Registrar of Cooperative Societies (RCS) Office te tangkawp in an buatsaih a ni a. Kum 2025 hi International Year of Cooperatives-a puan a nih tawh avangin he campaign hian Mizoram chhunga Cooperative Sector tan hmalakna ti chak lehzual turin awmzia a neih theih beisei a ni.