Festival inbuatsaihna thlirho
He thutkhawm hi Ser-chhip Bawrhsap Paul L. Khuma chuan kaihruaiin Serchhip District chhunga Head of Office te, khaw-tlang leh tlawmngai pawl hrang hrang hruaitute nen thutkhawm neia hmalak dan tur an lo rel tawh te leh an hmalak mek dan te a report a. Tihtur an bitukte tha taka an hlenchhuah avanga lawmawm a tih thu sawiin, he Championship hi tluang taka an neih ngei a beisei thu a sawi a ni. Tourism Department Director R. Lalrodingi pawhin Serchhip District chu Model District an nih thu leh DC ho a an hmalaknate Tourism-in an rintawk thu a dawn avangin Tourism Department chuan an ngai pawimawh em em a, Tourism Minister pawhin hemi chungchangah Vawiin hian a Office-ah Press Meet a neih dawn thu a sawi bawk.
Tun dinhmunah Federation Internationale Aeronautique (FAI) kaltlangin International Paragliding Accuracy Championship & Air Sport Festival-a tel turin ram 14 atangin pilot 79 an in ziaklut tawh a, nimin thleng khan mi 8 te chuan Serchhip hi an rawn thleng tawh a. December ni 9, 2024-ah Pilot te tan inziahluhna hun leh a tul tul inbuatsaihna neiin December ni 10-ah inelna neih tan a ni ang a, Serchhip DC Paul L.Khuma chu khuallian niin Pilot intihsiaka tel te a vailiam (flag off) dawn a ni.
He intihsiakna chhim duh mipuite tan Paragliding Tandem flight neih tan mek a ni tawh a. Hot Air Balloon a chuan theih a ni dawn bawk a. He Championship denchhen hian December ni 14 tlai-ah Concert buatsaih tum niin Air Sport Festival neih chhung zawng hian ei tur chi hrang hrang te, Handloom te, thei leh thei tui te, Dil Sangha man thar leh thil dang zawrhna tur Stall 15 siam a ni dawn a. Zawlpui-a Landing Site-ah Nghakuai Chiah Runpui buatsaih a ni bawk ang.