Fa pathum leh a aia tam nei chinte hamthatna duan hial kan rilruk - Chief Minister

Chief Minister Lalduhoma chuan nupa, fa pathum leh a aia tam nei chinte hamthatna duan an rilruk thu a sawi.

Mizo Zirlai Pawl (MZP) in an buatsaih Zofest 2024 inkhawm vawi hnihna nimin-a West Phaileng Lalbuanga Run-a neih a hmanpuina ah Chief Minister Lalduhoma chuan MZP in Mizoram-a politician eiru lo berah an lo thlan tawh thu leh remna leh muanna a awm theih nana a lo thawh ve ang ang te an lo chawimawi tawh thu sawiin, Kawng tam takah MZP nen ram leh hnam tan hna an thawkho mek tih a sawi a “Thil dik lo siamtha tura hma in laknaah sawrkar mitmei veng vak suh u tiin ka lo chah mai thin,” a ti. Chief Minister chuan Zofate kan tam a ngaih thu leh fa kan ngah deuh deuh a tul thu sawiin, “Kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei a ni. Pun hi kan sawrkar policy a nih avangin nupa, fa pathum leh a aia tam nei chinte hamthatna duan hial kan rilruk,” a ti a. Zofate kan inpumkhat deuh deuh tih kan hmu tih pawh sawiin, Mipuite chauh kan inpumkhat lova, Kohhran thlengin kan inpumkhat deuh deuh niin a sawi a, “Chin Hills-a kan unaute inpumkhata an awm theih nan ka ho ngeiin vawi tam tak kan thukhawm tawh a, a umzui tur bik pawl pawh kan din a, chu pawlah chuan MZP President pawh hi a tel a ni,” a ti bawk.

Ram ro hlu ber chu Human Resource tha a nih thu Chief Minister chuan sawiin, “Ram leilung hausa tak te pawh a chhunga cheng mipuite thiamna leh theihnain a tlin loh chuan ram changkang an ni lem lo. Leilung hausakna nei lo mah se a chhunga cheng mipuiten an zir miau chuan ram hausa leh thil tithei takah ram tam tak an chhuak si,” tiin thalaite chu zirna uar turin a chah a, “Lehkha zir kawngah i lo thleng sang ta lo a nih pawhin theihna dang, i din chhuahpui theih thilpek i nei ang tih ring tlat ang che. Vawi hnih khat fail vangin lo hnual reng reng suh. Khawvela industry leh company lian tak tak dintute, entreprenuer ropui ber ber te hi lehkha zir sang lo an tam lutuk. Chutiang mi chu i lo ni ve reng thei a ni. Mizoram hi Industry awm lohna ram anga hriat a ni mek a. Industry rama kan chantir a ngai,” tiin Handholding hmangin khaichhuah tlak thalaite an bana kaia din chhuahtir an tum thu te a sawi bawk a ni.

MZP in an buatsaih ‘Zofest’ hi kum hnih dan-a neih thin niin kumin hi tum 10 an buatsaihna a ni a, thupui atan ‘Hrui khat vuanin’ tih chu hman niin nimin-a he hun hman ah hian MZP President H. Lalthianghlima chuan MZP in Zofest a buatsaih chhan ber chu Zo hnahthlak unaute inkara inremna leh inunauna tha tundin a ni tih sawiin, Manipur-ah te, Assam-ah te, Tripura-ah te pawh an nghat kual tawh tih a sawi a, a hlawkna hi a kum telin kan hmu chho zel nia an hriat thu a sawi bawk.