Shalom Special School, Serchhip ten Rualbanlote Ni an hmang

Khawvel puma Rualbanlote Ni, International Day of Persons with Disabilities chu nimin khan hmun hrang hrangah hman niin Shalom Special School, Serchhip te chuan he ni hi Thennzawl a Lalat Park-ah an hmang a ni.

Shalom Special School Serchhip ten Rualbanlote Ni puala hun an hman hi Thenzawl PTS-a Principal Ruatsanga Ralte MPS chuan hmanpuiin Shalom Special School te chu tunhma atanga a lo hmelhriat tawh thu leh, School Zirtirtute inpekna chu fakawm a tih thu a sawi a, hlawh pawh nei lova kum engemawzat rualbanlote enkawltu naupangte chu a bika chawimawina pek tlaka a ngaih thu a sawi a. He School naupang te chu mi Special tak an ni tih sawiin, an hlim hmel leh nungchang chu tu pawi mah sawilo leh entawn tlak an ni tih a sawi a. An hlim hmel leh nungchang chuan Zoram mipuite hi zirlai pawimawh tak a zirtir tih a sawi bawk.

Nimin-a he hun hman hi Shalom Spastic Society Chairman Vanlalchhunga chuan kai-hruaiin zaithiam hrang hrangte nen hun hlimawm tak an hmang a, Police Training School Thenzawl leh PTS Kohhran Thenzawl te chuan Shalom Special School te hnenah hian an Krismas hmanna tur leh tul apianga hman tur sum leh pai an pe bawk a ni.

International Day of Persons with Disabilities pual hian Aizawl-ah chuan Social Welfare Minister Lalrinpuii hovin hun hman a ni a, he ni pual hian Social Welfare & Tribal Affairs Department, Federation of Mizoram Disabled Organisations (FMDO) leh National Institute for Locomotor Disabilities- Regional Centre tangkawpte bultumin rualbanlote, an chhungte, an puala hnathawktute leh anmahni ngaihventu zirlai leh mipui engemawzat te nen Canteen Kual atangin Zarkawt Recreation Centre thleng kawng zawhin Programme hman chhunzawm nghal a ni a. He hunah hian Social Welfare Minister chuan tunhma lam kha chuan Mizo khawtlangah rualbanlote enhniamna leh nawmnah taka chhawnchhaiha, nuihza siam nana hman te kan ching nasa em em tih sawiin, “Hei hi ngaimawhin upate’n ‘Piansualin tlai luat a nei lo’ tiin min zilhhau thin a nih kha. Pianphunga rualbanlote dinhmuna din chu duh lo vek mah ila anmahni dikna leh chanvo lam erawh chu kan ngaihthah leh hle si ni hian a la hriat a ni,” a ti a. Sawrkar in rualbanlote tana hma a lakna hrang hrangte pawh a tarlang bawk a ni.