Ashtalakshmi Mahotsav-ah Sports Minister a tel

Hmarchhak state hrang hrangte puala DoNER Ministry-in kar kalta Zirtawpni atanga intawhkhawmna lian a buatsaih, Ashtalakshmi Mahotsav-ah Mizoram sawrkar aiawhin Sports Minister Lalnghinglova Hmar chu a tel.

He hunah hian Sports Minister chuan Mizoram leh hmarchhak State-te hmasawnna tur hrang hrang sawiin, Infiamna chungchang bikah Khelo India Scheme kaltlanga sum hmuh thin chuan hmarchhak State mipui, infiamna ngaina te mamawh a phuhru zo meuh lo niin a sawi a. Prime Minister Narendra Modi kaihhruaina hnuaiah India-in Olympic 2036 thlen a dil thu leh inbuatsaih a tul thu sawiin, “India sawrkarin Olympics thlenna tur Sports infrastructure ropui leh changkang tak tak a din thei ngei ang, mahse chung infrastructure-ah te chuan tunge inel dawn tih kan inzawh a ngai. India tan Olympic thlen chu zahthlak-a a chan loh nan tun atangin hmalak a tul tawh a ni,” a ti a. India hmarchhakah Sports talent a awm thu pawh sawiin, mumal taka investment kalpui a nih phawt chuan Olympics 2036-a India hlawhtlinna kawng sialtu pawimawh tak a ni thei tih a sawi a, “North East-a sports hmasawn zel nan Ministry of DoNER in hmarchhak State-te Special Status dil sak thei se,” tiin rawtna a siam bawk.

He intawhkhawm hun hawnnaah hian DoNER Minister Jyotiraditya Scindia bakah hmarchhak State-a Chief Minister-te an tel a, State pariat atangin an thlai leh thei tharchhuah hrang hrang leh Kutthemthiamna hmanga an thil siamte phochhuah a nih bakah mithiamte inrawn-khawmna hun buatsaih a ni. 

India hmarchhaka MP hrang hrangte sawm an nih angin Mizoram Lok Sabha MP Richard Vanlalhmangaiha pawh hawnna inkhawm ah hian a tel bakah, hmarchhak atanga infiamna lama mi hmingthate sawm an nih angin Mizoram atangin Jeje Lalpekhlua MLA pawh a tel a ni.