Chief Secretary in Champhai District a tlawh

Zonuna Kawlni (LENKAWL) • December 9, 2024 • Comments • Mizoram

Chief Secretary Khilli Ram Meena chuan Champhai District-a raltlante awmkhawmna hmun pahnih - Champhai Zote ITI Camp leh Bethel Camp, Zokhawthar te chu Inrinni khan tlawhin Indo-Myanmar ramri a tlawh bawk.

Chief Secretary Khilli Ram Meena hi Champhai Bawrhsap VL. Remliana, Addl. SP PC. Laltanpuia, sawrkar Official dang te leh Sub-Hqrs. YMA hruaitu ten an tawiawm a, raltlan enkawlna kawnga an hmalakna hrang hrang leh harsatna an tawh te lo hrilhin, Champhai Zote ITI Camp-a awm mek te chu Sub-Hqrs. YMA ruahmanna angin Champhai Zion Veng-ah sawn tum mek an nih thu an lo hrilh bawk a ni.

Champhai Zote ITI Camp-ah hian tun dinhmunah raltlan mi 317 awmin puitling mipa 169 leh hmeichhia 62 bakah naupang 86 an ni a. Bethel Camp, Zokhawthar-ah hian mi 399, puitling mipa 110 leh hmeichhia 177 bakah naupang 112 an awm mek a ni.

Inrinni vek khan Chief Secretary kaihhruaiin Champhai District-a sawrkar pisa hotute an thukhawm a. Ramri chungchang, Solid Waste Management leh Agriculture Department hmalakna te an sawiho a ni.