AR chhuahsan ram khauh taka humhalh tum a ni

Chief Minister Lalduhoma’n Assam Rifles ram luah an chhuahsan hunah an ram chu khauh takin an humhalh dawn tih a sawi.

Centre for Environment & Social Justice (CESJ) buatsaih Assam Rifle ramchhunga thing chhiarpui leh zirchianna, Tree Inventory & Carbon Storage of Assam Rifle Campus, Aizawl, Mizoram lehkhabu tlangzarhna hun Inrinni-a neih he thu hi sawiin Chief Minister chuan, Assam Rifles sawnchhuah tur chungchang ah hmalak mek a ni tih a sawi a, ram tehin Joint Survey an nei mek tih a sawi a, “Ram hi khauh takin kan humhalh dawn a ni,” a ti. Chief Minister chuan khawvelin hmasawnna ngialnghet leh rochun theih a ngai pawimawh tawh tih pawh sawiin, hmasawnna hnathawh chu khuarei daih leh leilung tichhe lo thei ang ber an ni zel tawh tih a sawi a, theihtawp chhuah a pawimawh thu leh hmasawnna hna thenkhat chu ram leilung tichhe zawnga kalpui ngai a awm thin tih a sawi bawk.

Aizawl-a Assam Rifles chhuah lam pang ram, Vawiin-a ramngaw tha taka lo chang ta hi Bethlehem Branch YMA ten kum 2008 atanga ‘Aizawl Chuap’ hming phuaha hma an lo lakna rahchhuak a ni a. Tunhmaa Bawngpu par an tih, thenkhatten Vaivakawn an tih bawk hmun zau tak kha tunah hian ramngaw tha tak a lo chang tawh a. He zirchianna lehkhabu Editor hi Dr. Vanramliana a ni a, zirchiannaa a lan danin Assam Rifles ram Ha 16.9 a zauah hian thing chi hrang hrang chi 480 a awm a, Species hrang 80, Family 31 leh Genera 59 an awm nia chhinchhiah a ni. International Union for Conservation of Nature te tehfung atanga tehin riral hlauhawm tak venhim ngai bik thing chi 4 a awm a, an riral hlauh-thawnawm pakhat leh dinhmun ngaihtuahawm 5 an awm bawk. An zinga 71 hi ramhmul damdawia hman theih leh ei theih chite niin he hmun hian Carbon Dioxide (CO2e) 5766.73 bawr vel a hip lut tih hmuhchhuah a ni.

CESJ Working Chairman Vanramchhuangi pawhin CESJ ngaihdanah ramngaw chu humhalh hmasak phawt nise an tih thu he hunah hian a sawi a, Hmasawnna chuan ram leilung leh ramngaw tichhe lo thei ang berin, a humhimna dan zawm tlat chungin thawk se an duh tih a sawi bawk.