Zohnahthlak raltlan Jail a awm te Mizoram-a lak duh

Central YMA chuan Myanmar buai avanga Zohnahthlak raltlan Manipur Jail-a hren mekte chu Mizorama lak chhawn theih dan kawng dap turin Home Minister K. Sapdanga an ngen.

Central YMA hruaitute hi nimin khan an President Lalhmachhuana hovin Home Minister Pisa-ah an leng a, thil pawimawh hrang hrang thlenin Myanmar buaina avanga Zohnahthlak raltlan Manipur Jail-a hren mek te chungchang hi an thlen bakah tunhnaia Sub-Hqrs. YMA Cham-phai huamchhunga Myanmar Raltlante khawsakna In chu Sawrkar lamin an hman a tul dawn tak avangin Relief Camp thar sakna tur DM&R Department a senso tur sum an dilna lehkha DM&R Minister ni bawk hnenah hian an thehlut a. Home Minister chuan Central YMA hruaitute thil thlen chu thil tul tak a nih thu leh tha a tih thu a lo hrilh a, Relief Camp chungchang ah a rang thei ang bera hmalak dan tur rel turin Committee koh a nih tur thu a lo hrilh a. Myanmar buai avanga Zohnahthlak raltlan mi engemaw zat, Manipur Jail-a hren mek te chu Mizoram lama lakchhawn theih dan kawng dap tura Central YMA ngenna pawh Police lam hotute nen hmalak dan tur an lo sawiho tur thuin a lo chhang a ni. 

Central YMA hruaitute hian Village Profile Apps thar Lailen Consulting Pvt. Ltd. an siam tir chungchang Home Minister hi an sawipui bawk a. Home Minister hian senso ngai belh tur a awm a nih pawhin a rang thei ang bera hman theih a peih nise a lo ti a. Tunhnaia Zirlai Pawl pakhat hruaitu man an awm chungchangah dan chunga leng tumah an awm loh thu leh hetihruala he thil thleng avanga Mizoram Zirlai pawl leh hruaitute inkarah te, Sawrkar lam nen a inkarah te pawh boruak thalo awmlo tura ram leh hnam ngaihtuahna fim tak nena kalpui a tul an tih thute an sawi a ni.