Ruang phurhna man dilna lut 91 a awm tawh

Mizoram sawrkarin ruang phurhna man tum sak tura a tih hnuah ruang phurhna bill lut 91 a awm tawh a, an la dawn belh zel bawk.

Social Welfare Minister Lalrinpuii chuan nimin-a thuthar thehdarhtute a kawmna ah khawpui zawk atanga thingtlang lama ruang phurh chu thil buaithlak tak, bialtu MLA emaw, tu emaw in a tum thin avangin a hautak tih a sawi a, ‘ZPM a sawrkar chuan sawrkarin mawh-ah a la ang’ tia an lo sawi lawk tawh angin ruang phurh man hi sawrkarin a tum turin sum dah a ni tak thu leh kumin September 1 atang khan hman tan a nihm thu a sawi a. Ruang phurh man dilna atan hian kalchilh-a lehkha thehluh (manual) chu mipui tan a buaithlak avangin Mizoram State e-Governance Society nen tangdunin Online-a thehluh a, Bank Account kaltlanga ruang phurhna senso pek a nih theihnan hma lak mek a ni tih a sawii.

Social Welfare Joint Secretary Zonunthari chuan ruang phurh ah mipui tana awlsam tur an zawng ve zel tih sawiin, Damdawi In-a thi an nihin Doctor duty hriatpuina, In lama thi an nihin VC/LC/ YMA adt hriatpuina a ngai a, thil engemaw hetiang hi phut neih ve loh chuan thil dik lo tih palh theih a ni tih a sawi a. Tunah hian Finance Department atangin cheng vbc. 5 sanction an hmu tawh a, lakchhuah phalna dil mek niin, ruang phurh manah hian sum pekchhuah a la awm chiah lo a, mi 91-in bill thehlut tawhin, a la luh belh zel tih a sawi.

Tunah rih chuan bialtu MLA te emaw in ruang phurh man hi an lo peksak rih mai a, re-imbursement ang deuhin a hnu ah pek leh mai tur a ni tih a sawi bawk.