Ruahman ang ni lova Health Clinic sa te chungah sawrkar in a tul angin hma a la dawn

Health Minister Lalrinpuii chuan SASCI sum hmanga Health Clinic 235 sak tura sawrkar hmasa hunlaia lo ruahman tawhah Plan leh Estimate anga sa lo an awm a nih chuan an chungah a tul angin sawrkarin hma a la dawn tih a sawi.

Nimin-a Aizawl Press Club-a thuthar thehdarhtute a kawmna ah Health Minister Lalrinpuii chuan sawrkar hmasa khan SASCI 2022- 2023 sum hmangin hmun 235-ah Health Clinic sa turin plan a lo siam thu leh pakhat sakna atan cheng nuai 2.96 rate ang zela siamin, hmun 60-ah chuan an lo sa zo hman tawh tih a sawi a. Sawrkarna an chana hemi chungchang hriattir a nih chuan a lungawi lo hle tih sawiin, “Tunah pawh hmun tinah thawktu kan indaihloh laiin, Health Clinic hmun 235-ah chuan engtin nge thawktu kan dah kim theih ang, tih chu ka rilrua lo awm lian ber a ni. Hmun hrang hrangah kan Health Infrastructure a chhe em em a; kan Office leh Quarters a chhe em em hlawm a; hetiang thawmthatna atan te hian hman a theih zawk lo em ni, tiin official-te ka zawt a. Mahse, sawrkar hmasa in Utilisation Certificate a lo pek vek tawh avangin tih danglam theih a ni ta lo a ni,” a ti a. PWD rate hman lai - SOR 2019 anga Plan leh Estimate hi siam niin, hemi ang lo-a lo sa an awm a nih chuan a tul angin sawrkarin a hma la dawn tih a sawi bawk.

Kumin December atangin Zemabawk a Mizoram State Cancer Instutite-ah Cancer an zai thei tawh dawn tih Health Minister chuan sawi bawkin, Cancer zai tur Doctor an neih pawh zai thei turin hmanrua leh thawktu sawrkarin a pe a, December atang hi chuan hmun danga refer ngai loin an zai ve thei tawh dawn tih a sawi a ni.

Lung tha lo zai theihna tur an buaipui mek tih pawh Minister chuan sawiin, hemi atan hian AIIMS New Delhi chhuak Mizo Doctor an be tawh a, hmanrua leh thawktu mamawh dan thlenin, Finance Department-ah a tang mek tih a sawi bawk a. An Doctor biak hian Private damdawi In-a cheng nuai 7-8 vel sen ngaihna ah sawrkar damdawi In-ah chuan nuai 1.5 vela zai theih a inring tih sawiin, Zoram Medical Centre-ah inbun an tum tih a sawi bawk.