Zo Inspiration Foundation-in intawhkhawm buatsaih

Midangte tanpuina kawnga hriat hlawk, Zo Inspiration Foundation chuan nimin khan an tanpuite nena intawhkhawm hmasa ber chu Aizawl Laipuitlang-a Verdant Multipurpose Hall-ah an nei a, he hun hi Chief Minister Lalduhoma chuan a telpui a ni.

Nimin-a he hun hman ah hian Chief Minister Lalduhoma chuan, “Zo Inspiration Foundation rawngbawlna video chiang zawkin ka han en a, ka te chem chemin ka inhria. In hnathawh ropui tak hian min tichak a ni,” tiin Sawrkar dan hnuaia foundation tha taka a chang ta chu lawmawm a tih thu a sawi a. “Thui lehzual in kal thei dawn a, mi tlawmngaite thawhlawmah chauh innghat lovin CSR thlengin in dap ve thei tawh dawn a ni,” a ti. Chief Minister chuan mihringte hian kan pian hmaa mite rawng kan bawlsak thei lo tih sawiin, kan thih hnua thangthar lo awm zel te rawng pawh taksa in kan bawl thei tawh lo tih a sawi a, “Kan damrualpuite rawng chauh hi kan bawl thei a ni. Kam damrualpuite rawngbawlsak hna hi hna ropui ber chu a ni,” a ti a. “He foundation pawh hian chu hna chu in thawk a, nangmahni kaltlanga thilpek petute zawng zawng pawhin chu hna chu an thawk a ni. Rawngbawlna peng hrang hrang a awm a, kan hnathawh theuh hi rawngbawlna a ni. Tha taka hlentu nih tumin i bei ang u,” a ti bawk.

Chief Minister chuan mi inphal ten miharsa te tanpuina thilpek, Chief Minister Relief Fund an chhunluh chu an pechhuak ve reng tih sawiin, “Nimahsela, CMRF ai maha nasain nangni in hma in lo la. Thawhho theihna tam tak kan neih a rinawm. Chak tak leh huai takin lo kal zel ula, in hmaah kawng bumboh a awm fovang tih ka hria,” tiin tanpui ngaite tan, Zofate hming timawitu kal zel turin duhsakna a hlan bawk.

Zo Inspiration hi kum 2020 March thla vel atang khan Emmanuel Thangrosanga chuan youtube channel hmangin bul a tan a. Foundation din tan ni atan June 7, 2020 chu hman a ni a. June ni 22, 2020-ah Samtlang Quarry chim vanga nunna chan Lalhruaizela kalsan tak a chhungte chhawm-dawlna thilpek, mi inphalte kaltlangin a dawng a. Hei hi mi harsa leh tanpui ngaite tanpuina lama a bul tanna a ni. Emmanuel Thangrosanga hian a hnathawh mek, zirtirtu hna bansanin he lama hmalakna hi hun pumin a kalpui ta a ni. Tun thleng Vehbur tum 85 an khawn tawh a, chuta tanga thilpek tlingkhawm chu cheng nuai 300 chuang a ni. Heng sum hmang hian chenna In thar sak leh chei that 18 an nei tawh a, mi harsate eizawnna tur eichawp dawr 3 an pe tawh a, zirlai naupang sponsor 26 an nei mek a. Heng bakah hian thilpek tam tak an sem chhuak tawh bawk a ni. Kumin March ni 15 khan Society Registration an nei a, mumal leh fel fai takin an inenkawl a, Office hi Ramhlun Venglai, Aizawl-ah neiin thawktu pariat an awm a ni.