Bana kaih Policy hnuaiah Mizoram in bung thar a kai tur thu Chief Minister in a sawi
National Livestock Missions leh Handholding Scheme kal dunna (convergence) tur chu nimin khan Chief Minister Lalduhoma chuan Aijal Club McCabe Hall-ah a hawng a, Bana kaih Policy hnuaiah Mizoram in bung thar a kai tur thu a sawi bawk.
National Livestock Missions leh Handholding Scheme Convergence hawnna hunah hian Chief Minister Lalduhoma chuan kan ram in bung thar a kai mek thu sawiin, “A thlawna sem emaw, dawn emaw rilru kalsanin thawhrimna zawk hmanga dinchhuah tumin ke kan pen mek. Handholding Scheme hian mi taimate lam a hawi a. Chutiang mite tana buatsaih chu a ni,” a ti a. COVID-19 leh ASF rawn len hma khan Agriculture & Allied Sector a kan thawhchhuah zawng zawng zaa 45 chu AH & Vety atanga thawhchhuah a nih thu leh Hripui len hnu kum 2021-ah chuan zaa 23-ah a tlahniam tih a sawi a. “Chu kan tlakhniamna atanga kan chuan chhuah leh theih nan tuna kan convergence hi a tangkai hle ang,” a ti a. Handholding thawhpui (partner) diltu an tam tawh thu leh lawmawm a tih thu sawiin, “Kuminah hian Pilot Phase ang chauhvin kan la kal a ni tih mipuiten min hriatsak se kan duh. Nakum atangin lian zawkin kan kal tan chauh ang,” tiin Component pakhat zawk CM Special Package dilna thehluhna hmun Chief Minister Office chu a diltute tana pan a harsat avangin District tina DC Office-ah thehluh theih a nih thu a sawi bawk.
Chief Minister chuan National Livestock Missions chu project cost zatve (50 %) sawrkar laipuiin a tum leh a chhawrtu (partner) ten Total Expenditure atanga zaa sawm (10%) an tum thu sawiin, “A bak sum leh pai mamawh dang zawng chu loan atanga hmuh tur a ni. He loan-ah tak hian a chhawrtute hian harsatna an tawk ta thin a. An harsatna tawhna lai tak hi Handholding hmangin sawrkarin a pui ve thung ang a. Loan la turte tan sawrkar chu Guarantor-ah a tang anga, loan an rulh that chuan loan pung (interest) kha kan subsidy leh ang. A rul tha lote chungchang erawh kan sawi tel thei lo. Tichuan, a chhawrtute tana Scheme tha leh duhawm takah a lo chang ang,” a ti bawk.
Ranvulh rualin sa processing lam pawh ngaihtuah thlen a ngai tih Chief Minister chuan sawiin, “Meat processing Industry hi Handholding Scheme-ah kan telh thar dawn a. Kan thalai, hetiang lama theihna neite tan remchang a in hawng dawn a ni. Ranvulhtute tan Animal Insurance Scheme tha tak kan neih a ngai a. NLM hnuaia Animal Insurance Scheme kalpui thinah State sawrkar sum thawh tur hi zaa sawmthum (30%) a ni thin a. Keini ang State pachhe tan chuan a sang lutuk a, kan tlin ngang lova. Central sawrkarah min tihhniamsak turin kan ngen a. Tunah chuan zaa sawm (10%) ah min rawn siamsak ta a ni,” a ti bawk.
He hunah hian AH&Vety Minister C. Lal-sawivunga pawhin Mizoram chu sa, artui leh bawng-hnute-ah te a la intodelh lo hle tih sawiin, nikum 2023-a State pawn lam atanga Mizoram-in Arsa a chawkluh zat chu MT 1309 niin Bawnghnute litre nuai 76 leh Artui pum nuai 91 chawkluh a nih thu sawi a. Heng te hi a nawlpui-a chhutin cheng vbc. 101 hu vel a nih thu sawiin, hemi kawnga sum-dawnna leh eizawnna kawng inhawng zau tak awm sa chu Mizoram chhunga thalai leh hemi lama a ngaihna hria ten tih takzeta an buaipui a ngaih thu leh an Department pawhin hma a sawn zel thu a sawi bawk a ni.
National Livestock Missions hi Vawkpui vulh te, Kel vulh te, Ar awpkeuna leh ranchaw siamna lam te-a liantham taka hmalakna tur Scheme a ni a. Tanpuina sum pawh a tam tham a. Tunah hian North East State zingah Mizo-ram chu NLM a ti tha ber niin, he Scheme kaltlang hian mi 76 in Loan an la tawh a, mi 31 in subsidy an hmu tawh a, mi 21 chu subsidy hmu leh tura peihfel an ni leh tawh bawk a ni.