Zirtirtute tan ruihhlo do inzirtirna neih tan a ni

Ruihhlo dona kawnga naupangte zirtirtu tur zirna In-a thawkte tana training chu nimin khan Serchhip District Bawrhsap Paul L. Khuma chuan a hawng.
Serchhip DC Pisapui Hall-a ‘Trainers training for School teachers on drug prevention’ ah hian Bawrhsap Paul L. Khuma chuan ruihhlo dona hi a khawnawta kalpui a ngai tawh tih sawiin, Social Movement anga kalpui a tul takzet tawh a ni, a ti. Mizoram thalaite zingah ruihhlo a hluar a, a tithar an pung a, a tithin te an naupang telh telh ta mai chu a manganthlak takzet tih a sawi a. Sawrkar laipuiin ruihhlo dona Scheme a siam te, Mizoram Sawrkarin Task Force a siam te, Police leh Excise Department te hmalakna chauh chu ruihhlo dona atan a tawk zo tawh lo tih sawiin, Kohhran ah te, Sunday School-ah te, zirna In zawng zawngah te tih takzet a tan lak a tul thu a sawi.

Mizoram Chief Minister Lalduhoma hmalaknain a bial, Serchhip-ah ruihhlo do hna hi nasa taka kalpui mek a ni a.  Serchhip-a School 25 thlangchhuakin ruihhlo dona atana an hman tur chu nimin-a he hun hman ah hian Rs. 10,000/- theuh pek an ni a. Heng School 25 thlanchhuah atang hian Zirtirtu pahnih theuh tel tura sawm niin ruihhlo dona chungchangah training pek an ni a. Anni hian an School theuhah an zirtir leh dawn a, he Training hi Vawiin ah chhunzawm leh a ni ang.

Nimin-a Trainers training for School teachers on drug prevention hi Serchhip SDEO Melody L. Betlu chuan a kaihruai a. Social Welfare and Tribal Affairs Department atangin Lalfakawmi chuan thu sawiin, Dr Marilyn Lalruatkimi chuan lawmthu a sawi bawk a ni.