Serchhip-ah The Mizoram Government Land Pooling and Management Scheme chungchang sawiho a ni

District Level Authority on The Mizoram Government Land Pooling & Management Scheme chu nimin khan Serchhip DC Meeting Hall-ah an Chairman leh Bawrhsap Paul L. Khuma kaihhruaia thukhawmin he Scheme kalphung te inhruilhfiah a nih bakah dilna lut te ngaihtuah nghal a ni.

He thutkhawm ah hian District Bawrhsap chuan Land Pooling Committee nih phung sawifiahin, State-ah leh District chhungah Department hrang hrangte leh Office-in ram an neihte chu sawrkar leh mipui tana tangkai lehzual zawka hman a nih theih nan leh a riral lohna tura he Committee hi din a nih thu a sawi a. Serchhip District-ah pawh Office hrang hrang ten mahni Office ram leh hmunhma an neih te chu District Land Pooling Committee remtihna tel loa mimal emaw, Pawl emaw tana sahthlak a remchan loh thu te a sawifiah a ni.

Land Pooling and Management Scheme chungchang ah hian September ni 14, 2018 khan Mizoram Sawrkar General Administration Department chuan notification a lo tichhuak tawh a. November ni 11, 2019-ah tlema siam remin Notification a tichhuak leh a. He Dan hmang hian sawrkar Department hrang hrang ram neih te chu chhunkhawm (pool) in General Administration Department chuan mumal leh tangkai zawka hman theih tura tih a ni a, Sawrkar Department hrang hrangten document an neih te GAD-ah an thehlut bawk a ni. He hmalakna hi Department thenkhatin ram zau tak tak an neih laia a thenin an nei loh avangte leh rualkhai zawk leh tangkai taka ram hman a nih theih nan leh thil pawimawh dangte ngaihtuah a hmalak a nih theihna tura ruahmanna a ni. 

Nimin-a thutkhawm ah hian Serchhip District chhunga Head of Office zawng zawngte telin PHE Department-in tui dahkhawlna (Water tank) siamna tur ram an dil chungchang chu sawiho a ni a. Social Welfare, Tribal Affairs, Women & Child Development Department-ten Serchhip khawpui lun laia Office sakna tur ram an dil chungchang ngaihtuah a ni bawk a. Committee chuan State Level Authority-ah thlen nise tiin an rel a ni.