Union Minister hovin Mizoram-a hmalakna thlirho

Union Minister of State for Housing & Urban Affairs (MoHUA) Tokhan Sahu chuan nimin khan Urban Development & Poverty Alleviation (UD&PA) Department hotute kawmin Aizawl Smart City Ltd. hnuaia Project, Swachh Bharat Mission (Urban) (SBM-U), Atal Mission for Rejuvenation & Urban Transformation (AMRUT), Pradhan Mantri Awas Yojana - Urban (PMAY-U) leh Deendayal Antyodaya Yojana - National Urban Livelihood Mission (DAY-NULM) chungchanga an hmalakna leh an harsatna te a sawipui.

Planning & Programme Implementation (P&PI) Conference Hall-a he sawihona hunah hian Union Minister Tokhan Sahu chuan Central Sawrkar chuan India ram hmun tinah hmasawnna a awm theih nan leh tumah hi hnuaihnung bik lo se an duh avangin theihtawp a chhuah mek tih a sawi a. Aizawl Smart City Ltd. hnuaia Project te chu nakum March ralhma-a zo hman ngei turin a chah a. Project zawh tawh te pawh tha taka mipui hriat theih tur leh an hman tangkai theihna turin branding lamah leh a puanzar lamah nasa zawka hmala turin a chah bawk.

Hmasawnna lama Master Plan an siam te chu hmathlir thui tak, Kum 20 hun lo la kal tur thlir chunga ngaihtuahna hmang tura a duhthu sawiin, Swachh Bharat Mission hnuaia IHHL (ek in) sak tawh te chu a scheme a zawh ruala tawp mai lovin a tul anga mipuiin an tangkaipui theih nana hmala zel tur leh mipui tam zawkin an chhawr theih nan an hna tha taka thawk turin a chah a. PMAY-U Scheme-ah pawh tun aia nasa zawka tan la leh sauh sauh turin Department hotute chu a chah bawk.

He hunah hian UD&PA Minister K. Sapdanga chuan Minister in a hun chep tak kara Mizoram a rawn tlawh thei chu lawmawm a tih thu sawiin, Mizoram chu tlangram a nih angin MoHUA hnuaia project hrang hrang kalpui mekah hmanhmawhpui a, hna thawhna tur pawisa sanction thuai turin a ngen a. Kumin Cyclone Remal-in Amrut 2.0 hnuaia project a tihchhiat te chu a thara siam thatna tur sanction tura ngenin a tul anga hmalakpui a, second installment release thuai turin a ngen a. Aizawl Smart City Ltd. hnuaiah project 49 atanga project 28 complete anih tawh thu sawiin, project 22 chu nakum March 31-ah zawh tura ruahhman niin project 5 chauh nakum March 31 hnu lamah zawh hman tura beisei a nih thu a sawi bawk a ni.

He hunah hian CC Lalchhuangkima, CEO, Aizawl Smart City Ltd. chuan Smart City hnuaia an hmalakna hrang hrang a lem nen entirin UD&PA Director Dr. Andrew Vanlaldika chuan Ministry of Housing and Urban Affairs (MoHUA) kaltlanga Centrally Sponsored Scheme pali hnuaia an hmalakna te powerpoint presentation hmangin a tarlang bawk a ni.