Sawrkar laipui in a puih that tawk loh avangin Mizoram Power tharchhuah a tlem niin sawi
Power Minister F. Rodingliana chuan Mizoram chu kawlphetha 3500 MW chuang tharchhuak thei a nih laiin tun dinhmunah MW 50 pawh a la thar loh thu sawiin, a chhan bulpui ber chu sorkar laipui in a sum leh paiah a puih that tawkloh avang a nih thu a sawi.
India rama State leh UT-a Power Minister te Conference tunkar Thawhlehni-a Yashobhoomi, Dwarka, New Delhi-a neih ah Power Minister F Rodingliana chuan kawlphetha siamchhuak leh pek kaihhnawih a Mizoram dinhmun leh harsatna tawh rang hrang te a thlen a. Power Minister hian kalkhawmte hmaah Mizoram Sawrkar chuan kawlphetha tharchhuah chu an ngaih pawimawh ber anih thu sawiin, Mizoram chu kawlphetha MW 3500 chuang tharchhuak thei a nih laiin tun dinhmunah MW 50 pawh a la thar loh thu a sawi a. A chhan bulpui ber chu sawrkar laipui in a sum leh pai-ah a puih that tawkloh avang a nih thu sawiin, Central sawrkar chu theihtawp chhuahpui turin a ngen a ni.
Power Minister chuan India ram State dang zawng zawng deuhthaw in anmahni pualin tuikhuah lian nei tawh in, Mizoram in tuikhuah lian a neih ve chhun Tuirial Hydel Project chu Central PSU NEEPCO ta a nih thu leh State sawrkar in ram zau tak pe in Compensation atan cheng vbc. za tam tak a sen thu a sawi a. Chuti chung chuan man to em em in power lei a nih thin thu te, hetiang ang project chu Mizoram sawrkar chuan din a remtih tawh loh thu leh tuna MW 3500 thar theihna a neihte pawh Mizoram in hlawkna tam zawk a neih ve na tur anih phawt chuan Company rawn luh pawh tha a tih thu te a sawi a. NEEPCO in eng chhit loh man, Shortfall Energy Bill cheng vbc. 102 lai mai a thin tawh thu kalkhawmte hmaah sawiin, hetiang harsatna hi a thlen tawh loh nan Ministry of Power leh CEA lam thuneitute chu hma la turin a ngen nghal a ni.
Mizoram sawrkar in Central lama Project a theh thlakte a tlangpui in State dang aiin Project Cost a sang bik ni a chhanna an dawn thin chu sawifiah bawkin P&E Minister chuan, Mizoram chu State dang te nena khaikhin theih a ni lova, India ram hmarchhak kilkhawr, tlangram chhengchhe taka awm anih avangin kawng a kualin bungraw chawkluh man a to bik em em a, kumkhatah Furpui ruahtui tlak tam lai ni 100 chuang anih avangin Company tam zawk an rawn kal tha duhlo tih a sawi a, “Kan thenawm lawk Guwahati-ah Cement bag 1 chu Rs. 300/400-a a lei theih laiin Mizoram-ah chuan Rs. 500/600 chuang a lei a ngai a, hengte hian Project Cost a ti to,” a ti a, hei vang hian ngaihnathiamna sang tak nei turin Central lam thuneitute a ngen nghal bawk a. Chutihrual chuanin Mizoramin ruahtui a dawn tam chu power lam atan chuan malsawmna a nih thung avangin Hydel project tam zawk siam turin Mizoram sawrkar a inbuatsaih thu a sawi a, theihtawp chhuaha Central lama thuneitute puihna a ngen nghal a ni.
Mizoram Power Minister hian North East Power Ministers Meeting-a a lo thlen tawh MNRE Scheme leh kum 2014-a tihtawp tak ‘Development of Small Hydel Project’ chu NE State ten an lo hlawkpui tawh thu sawiin, North East Power Minister zawng zawng ten he Policy hi tihnun leh an duh thu leh an nghakhlelh tih sawiin, Power Minister hmasa hnena an lo thlen tawh chu bawhzui an duh thu a sawi bawk a ni.
Tun tuma Power Minister Conference hi Union Power Minister Manohar Lal Khattar chuan kaihruaiin he hunah hian thu pawimawh tak tak an sawiho zingah Mizoram-ah pawh kalpui tura hmalak mek heng Pump Storage Project Battery Energy Storage System (BESS) chungchangte, Electric Vehicle Charging Station buatsaih chungchangte, PM Surya Ghar Rooftop Solar hmalakna kal mekte, Smart Metering Project bakah Solar Park tam zawk din chungchang te a tel a ni.