Tuirial HEP-a Power hman loh man thin thu ah Mizoram Sawrkar CERC-ah zualko a tum
North Eastern Electric Power Corporation (NEEPCO) Limited in Tuirial HEP Power hmanna Bill pangngai ni lo, Supplementary Bill, Shortfall Energy bill cheng vbc 102 lai mai Mizoram Sawrkar thla tin a thin chu sawrkar in Central Electricity Regulatory Commission (CERC)-ah khinlet a tum.
Inrinni khan P&E Minister F. Rodingliana hovin a chenna In-ah P&E Department, Finance Department leh Law & Judicial Department hotute chu thukhawmin NEEPCO Ltd. in Tuirial HEP Power hmanna Bill pangngai ni lo, Shortfall Energy bill thla tin Mizoram sawrkar cheng vbc. 102 a thin chungchang hi an sawiho a. He Bill tam tham tak lo kal hi dan hnuaia ennawn tha leh turin Chief Minister Lalduhoma leh Power Minister F. Rodingliana ten lehkha mai bakah hmaihma ngeiah Central Power Minister an sawipui tawh a. Hemi thu kal zel ah hian Ministry of Power chuan hemi chungchang liau liau sawi tur hian a kaihhnawih (Stake holder) hrang hrangte September 24, 2024 khan Delhi-ah a lo kokhawm tawh a. Heti chung hian NEEPCO Ltd. hnen atanga dawn Shortfall Energy Bill hi Power leina ba tihlanna, PRAAPTI Portal-ah tarlan reng ala avangin hemi chungchang ngaihtuah hian Inrinni khan he Meeting hi neih a ni ta a ni.
He Meeting hian Power lei leh hralh chungchanga thubuai leh hlabuai ngaihtuahtu Central Electricity Regulatory Commission (CERC) hnenah zualko nise tiin an rel a, emi atana thil tul te chak tak buaipui nghal tura ruahman niin he harsatna hi CERC hnena thlen anih chuan a vai-a a ngaihhnathiam loh pawhin nasa takin a tih tlakhniam ngei beisei a ni a. He Shortfall Energy Bill hi khinlet anih loh a November thla chhunga ngei pek tlak anih loh chuan CERC lam hian Mizoram a thunun/regulate dawn a, CERC in a regulate chuan Mizoram Sawrkar in Power a hralhchhawn (Power Trading) khapsak in thildang tam takah a khuahkhirh dawn a ni.
Shortfall Energy Bill hi NEEPCO Ltd. hian April, 2019 atanga March, 2024 chhunga Tuirial HEP in Power a siamchhuah tur zat ruahmansa a siamchhuah theihloh avanga Mizoram Sawrkar a rawn Bill a ni a. Amaherawh chu CERC Regulation-a a inziah dan in kum khat chhung Bill chu a kum leh ah zel chauh an Bill tur anih lain NEEPCO hian kum 5 chhung bill a siam hi CERC Regulation bawhchhiatna nia hriain Mizoram Sawrkar chuan a khinglet dawn ta a ni. He thutkhawm ah hian Finance Commissioner, P&E Secretary, Law & Judicial Department Secretary bakah official pawimawh dangte an tel a ni.