Mizoram-ah PM-DAJGUA kalpui a nih dawn avangin Serchhip District-ah a kalphung inhrilhfiahna neih a ni
Ministry of Social Justice and Empowerment hmalakna-a kalpui tur Prime Minister Dharti AAba Janjatiya Gram Utkarsh Abhiyan (PM-DAJGUA) hi kum 5 chhung kalpui tura ruahman niin ruahman lawk ang chuan kum 2024-2025 atanga 2028-2029 chhung kalpui a ni dawn a, he ruahmanna hmang hian India ramchhunga hnam hnufual (Tribal) te ni tin khawsak leh eizawnna dinhmun siamthaa, Tribal chhungkua leh Tribal tamna khua te, Aspirational Block-a khua te, Tribal population tam tak awmna hmunah te an mamawh zualpui phuhru a chawikan vek a tum a ni a. He Scheme hmang hian Tribal tamna khaw thlanbikte intodelhna kawnga tanpui leh an hmunhma tihchangtlun a ni ang.
Prime Minister Dharti AAba Janjatiya Gram Utkarsh Abhiyan (PM-DAJGUA) hi Mizoram chhungah kalpui a nih dawn tak avang hian Serchhip District-ah pawh he ruahmanna chhawrtu tur mipui ten PM-DAJGUA awmzia leh an tana a tangkai dan tur an hriat theih nan tun thla ni 26 thleng khian inhrilhhriatna hun, IEC Campaign chu neih a ni dawn a, nimin khan he Campaign hawnna hun hi Serchhip DC Pisapui Hall-ah neih niin District Bawrhsap Paul L. Khuma chuan a hmanpui a. Mipui mimir te hmasawnna tur scheme tha tak Central Sawrkarin a rawn buatsaih leh ta chu lawmawm a tih thu sawiin, he Scheme hlawhtlinna turin Serchhip District mipuite leh sawrkarin thawhhona tha tak neih a tul thu leh Department tin te an pawimawh thu a sawi a, he Scheme hnuaiah Serchhip District tan ruahmanna (plan) tha tak siam tum turin kalkhawmte chu a chah bawk.
.jpeg)
PM-DAJGUA kalpuina tur hian District Level Committee (District Dharti Aaba Unit) din a ni a, he Committee-ah hian Serchhip DC chu Chairman niin khaw 5 bawr vel theuh ah thenin Block Level Implementation Team din a ni dawn a. He Scheme a hlawhtlin theihna turin Research Institute te, ITDA te, khawtlang hruaitu te, tlawmngai pawl hruaitu te a tam thei ang ber an tel dawn a. District Level-ah DPR buatsaihin State pawmpui turin thehluh a ni dawn a ni.
Development Action Plan for Scheduled Tribe (DAPST) sum te haichhuah loh a tam em em a. Mipui mimir in tangkai lehzuala an hman theih nan he Scheme thar hmang hian sum tam tak haichhuah belh tum a ni a. PM Gati Shakti Dashboard atangin digital in hmalakna te vil a ni anga. Ministry tinte tana target siam a, budget ruahmanna fel tak duan a ni dawn a, huntiam chhunga a nih tur ang nih tir hman an tum dawn a ni.
.jpeg)
Nimin-a Serchhip District-a IEC Campaign hawnna hun hi Serchhip Addl. DC Lalrinzuala chuan kaihruaiin SDO (Sadar) F. Lalnisai chuan PM-DAJGUA kalphung leh awmzia te a sawifiah bawk a ni.
PM DAJ-GUA Scheme hi kum 5 chhung kalpui tur a ruahman niin India ram a thingtlang khua 63,843 tuam tura duan a ni a. Mizoram-ah pawh khaw 383 a tuam tel ve dawn a, he Scheme kalpui nan hian cheng vbc. 79,156 ruahman a ni. Hmasawnna kalpui tur a huam hrang hrang zingah hmasawnna ruangam thar bun te, thing-tlang khawsak dinhmun chawikan te, zirna leh mipui hriselna tihhmasawn te a tel a ni.
Mizoram-a PM-DAJGUAkalpui tur hi Aizawl-ah chuan Chief Secretary H. Lalengmawia chuan a hawng a, Sawrkar in ruahmanna a siam thar hawn a ni chu lawmawm a tih thu leh Scheme awmsa engemaw zat chak lehzual a kalpuina tur a tih a nih avangin State, District leh Block Level-a Sawrkar a mawhphurna neite inkarah thawhhona leh tanrualna tha a pawimawh thu a sawi bawk.