Thenzawl leh Serchhip-ah Heroin man a ni

Thenzawl Joint YMA-a Ruihhlo Do Squad te chuan Inrinni (Nov. 2, 2024) zan khan Heroin nia hriat Hawng 27 zet an man a, a neitu nia hriat Gospel Lalruatfela, Thenzawl Venghlun nia insawi pawh manin hemi rual hian Sapzu Um pakhat leh Beer Can 18 an man tel bawk a, heng an thil man leh a neitu nia hriat hi Serchhip-a Excise & Narcotics Department te kutah hlan nghal an ni. Tun tuma Heroin an man hi gram 337.87 vela rit a ni a, Rs. 9,45,000/- hu vel nia chhut a ni.

Heng ruihhlo man chhui zuina kal zelah hian nimin zing dar 4:30 vel khan Serchhip-a Excise & Narcotics Department-a thawk te chuan Thenzawl kawng-ah heroin hawng 10 zet an man leh a, a neitu nia hriat Samson Malsawmtluanga (20) leh Jakob Lalhlimpuia (19), Lower Chanmari Veng nia insawi te chu manin heng mi te hi unau niin an insawi a, an damdawi man hi gram 120.1 niin thubuai siam sak nghal an ni bawk.