ILP dilna Online hmanga kalpui a ni tawh dawn

Tun thla, November 1 atang khan Mizoram pumah Inner Line Permit (ILP) dilna chu Online hmanga kalpui tawh tura tih a ni a, hemi atan hian District hrang hrangah pawh mipuite tana hriat tur te tihchhuah a ni.

Sawrkar thuchhuah in a tarlan danin ILP dilna hi ilp.mizoram.gov.in atanga thehluh tawh tur a ni a, Application hi sponsor-tu chauhin thehluh tur niin, Portal-ah hian a in register tur a ni a, Document pawimawh te hi Portal-ah upload vek tur niin Hnamdang, offline a Temporary ILP pekchhuah te chu Temporary ILP hi upload tel tur a ni bawk ang. Application hi approve a nih hnuah diltu hian a Mobile number thehluhah SMS in reference number a dawng anga, ILP Fee chu online a pek a nih hnuah reference number hmang hian ILP hi download theih a ni ang.

Hei bakah hian Security deposit chu ILP surrender a nih hnuah chauh pek kir tur a ni bawk a, ILP holder te hian engtik hun pawh a check theih turin ILP hard copy chu an kawl emaw, Soft copy hi Phone-ah an nei reng tur a ni ang. Online hmanga ILP dilna kalpui a nih tak avang hian November ni 1, 2024 hmaa ILP lo pekchhuah tawh te chuan an ILP valid chhung chu a hlui an la hmang thei dawn a, hriatthiam loh leh zawhfiah duh neite chuan mahni awmna Deputy Commissioner Office-ah te zawhfiah theih a ni bawk ang.