Sinlung Hills Council Inthlanpui neih tur atan Campaign theih hun a tawp ta
Sinlung Hills Council Inthlanpui vawi hnihna chu naktuk khian neih a ni dawn a, he inthlanpui neih tur atana Campaign theih hun pawh nimin tlai khan a tawp tawh a ni.
Seat 12 awmna Sinlung Hills Council Inthlanpui neih turah hian Party hrang hrangte chuan Inrinni khan Campaign kharna hun an hmang hlawm a, ZPM Party leh HPC tangdun chuan Inrinni khan SHC Bial hrang hrangah Campaign kharna hun an hmang a, Saipum Bial-a hun hmanpuitu ZPM President Lalliansawta chuan Sinlung Hills Council General Election-ah mipuiten hnehna an pe a nih chuan ‘Hmar thimpui’ ti-a sawi thin tlangdungah Hmasawnna kawl a eng ve tawh dawn tih a sawi a. Heng bakah hian Bial hrang hrangah an Party hruaitu leh Minister ten Campaign kharna hun hi hmanpuiin an candidate te lo thlang turin mipuite an chah a ni.MNF Party pawhin Inrinni vek khan Campaign kharna hun hi hmangin MNF Treasurer Lalruatkima chuan Khawlian leh Phuaibuang-ah hun a hmanpui a, “Sawrkar hmasaa kan malsawmna dawn zozai te hi ngaihtuah ila, kan khawtlang, bial leh kan ram hmasawnna min lo thlen saktute hi tute nge chhut ila, sawrkar kal tawhte vek an ni,” tiin “Kan tih dik loh leh tihsual palh tam tak a awm ang, chumi chungah chuan in mi ngaihdamna kan dil a. Pathian leh kan Ram tan theihtawpa ke pen chhunzawm turin tihtak zetin mipuite ka sawm che u a ni,,” a ti. MNF Vice President Lalchhandama Ralte pawhin Sinlung Hills Council inthlanpui ah bial 12 awmah bial 9 tal la turin an inbuatsaihtih a sawi bawk.
MPCC Sr. Vice President Lalnunmawia Chuaungo pawhin Khawlian, Phuaibuang, Suangpuilawn leh Vanbawng Bial-a khaw thenkhat te Inrinni khan tlawhin Sinlung Hills Council chu Congress party in a huamchhung mipuite dinhmun atana pawimawh nia a hriat avanga a siam a nih thu leh a hringtu ngeiin a enkawl a tul thu a sawi a. “Thil fel lo leh dik lo hi kan siam tha dawn. Sawrkar hnathawk awm lohna chhungkaw tan NLUP changtlung leh belh tlak zawk kan siam dawn a, Mizoram mipuiin a zar an zo leh dawn a, hlim takin an nun an hmang leh thuai ang. Hei hi Mizoram hmun hrang hranga mipuiin an nghakhlel a, an lunglen ngawih ngawih a, ruahmanna tha zawk duang turin ngaihtuahna kan seng mek a ni,” a ti bawk.